काठमाडौं । नेपाल प्रहरीको महानिरीक्षक आईजीपी नियुक्तिविरुद्धको रिट कामु प्रधानन्यायाधीश दीपककुमार कार्कीसहितको संयुक्त इजलासमा परेको छ । 

गत वैशाख १९ गते सरकारले जुनिएर एआईजी धिरजप्रताप सिंहलाई आईजीपी नियुक्त गरेपछि १६ महिना सिनियर एआईजी विश्वराज पोखरेल रिट लिएर सर्वोच्च पुगेका थिए । २२ वैशाखमा प्रारम्भिक सुनुवाइ हुँदा नै सरकारी पक्षले निवेदन हालेर बसहमा सामेल हुँदै अन्तरिम आदेश नदिन सर्वोच्चलाई अनुरोध गरेकाे थियो । 

अन्तरिम आदेश आए नेपाल प्रहरीमा विवाद हुने र निर्वाचनमा सुरक्षाजस्तो संवेदनशील विषय प्रभावित हुनसक्ने महान्यायाधीवक्ताको तर्क थियो । त्यही तर्कका कारण अन्तरिम आदेश नदिई अन्तिम आदेश दिनेगरी पोखरेलको रिटमा सुनुवाइको मिति जेठ १७ का लागि तोकिएको थियो । 

अन्तिम सुनुवाइ जेठ १७ मा हुने भन्दै दुबै पक्षले सार्न नमिल्नेगरी तोकिएको मितिमा न्यायाधीश विश्वम्भरप्रसाद श्रेष्ठ र न्यायाधीश कुमार चुडालको इजलासले एआईजी बढुवामा नै आईजीपी नियुक्ती पाएका सिंहका विरुद्धमा रिट भएको र सो रिटमा सिंहसहितलाई तामेलिसमेत नभएको देखिएको भन्दै सिंहविरुद्ध तत्कालीन डीआईजी ईश्वरबाबु कार्कीसहितले दायर गरेका रिटसँगै राखेर अन्तिम आदेश गर्ने निर्णय गरेको थियो । सोही इजलासको आदेश अनुरुप आज पोखरेलको रिटमा सुनुवाइ हुँदैछ । आज पोखरेलको माग संबोधन भए आईजीपी सिंहको आईजी कार्यकाल समाप्त हुन सक्छ ।