जलेश्वर । महोत्तरीको सदरमुकाम जलेश्वर नगरपालिका–६, ठूलो धबौली गाउँमा दुई महिलालाई ‘बोक्सी’को आरोप लगाएर कुटपिट गरी ज्यान मार्ने उद्योग गरेको आरोपमा प्रहरीले एक महिला र एक पुरुषलाई पक्राउ गरेको छ ।
पक्राउ पर्नेमा स्थानीय ४५ वर्षीय भुलनराम चमार र २८ वर्षीया सोमनदेवी भनिने सोमारी देवी रहेको जिल्ला प्रहरी कार्यालयका प्रहरी उपरीक्षक कृष्ण पंगेनीले बताए ।
प्रहरी उपरीक्षक पंगेनीका अनुसार सोही गाउँका दुई महिलालाई बोक्सीको आरोप लगाउँदै पक्राउ परेका भुलन र सोमारीसहित १०–११ महिला–पुरुष मिलेर शरीरका सबै कपडा च्यातेर निर्वस्त्र पारी कुटपिट गर्नाका साथै ज्यान मार्ने उद्योग गरेको भन्दै पीडितका छोरा र नातिले शुक्रबार जिल्ला प्रहरी कार्यालयमा जाहेरी दिएका थिए ।
जाहेरीपछि प्रहरीले सो घटनामा संलग्न रहेको आरोपमा भुलन र सोमारीलाई आज पक्राउ गरेको हो । निजहरूउपर बोक्सीको आरोप लगाई कुटपिट गरी ज्यान मार्ने उद्योग मुद्दा चलाएर कारबाही प्रक्रिया अगाडि बढाएको छ । बाँकी फरार व्यक्तिको खोजतलास भइरहेको जनाइएको छ ।
घटनाका प्रत्यक्षदर्शी स्थानीयवासीका अनुसार स्थानीय तलेवर राम, भुलन राम, रामु राम, राकेश राम, रवी राम, बहुरीदेवी राम, सोमनदेवी राम, आरतीदेवी राम, पवनदेवी राम र सुटियादेवी रामले ती दुवै महिलालाई बोक्सी भन्दै नग्न पारेर हात, मुक्का, लात्तीले मरणासन्न गरी कुटपिट गरेका थिए ।
मरणासन्न गरी कुटिएकी एक महिलाको जिल्ला अस्पताल जलेश्वरमा प्राथमिक उपचारपश्चात् थप उपचारका लागि प्रादेशिक अस्पताल जनकपुर लगिएको र अहिले पनि सोही अस्पतालमा उपचार भइरहेको बताइएको छ ।
प्रहरीले ती महिलालाई उद्धार गरी लगेपछि गाउँभन्दा ५०० मिटर टाढा खेतमा काम गरिरहेकी अर्की महिलालाई पनि सोही समूहले खेतमै गएर शरीरका सबै कपडा च्यातेर उनीसँग पनि त्यस्तै व्यवहार गरेको बताइएको छ । रासस
