काठमाडौं । एक दिनपश्चात् अर्थात् यही वैशाख ३० गते स्थानीय तह निर्वाचन हुँदै छ । देशभर एकैसाथ निर्वाचन गर्ने कार्यतालिका छ ।

कतिपय नेताहरू र मतदाता मतदानका लागि गृहनगर पुगिसकेका छन् । प्रधानमन्त्री समेत रहेका सत्तारूढ दल नेपाली कांग्रेसका सभापति शेरबहादुर देउवाले गृहजिल्ला डडेलधुराबाट मतदान गर्नेछन् । उनी विगत चार दिनदेखि गृहजिल्लामै रहेका छन् ।

प्रधानमन्त्री देउवाका प्रेस सल्लाहकार गोविन्द परियारका अनुसार उनले गन्यापधुरा गाउँपालिका–१, रुवाखोलको आसिग्राम प्रावि मतदान केन्द्र ‘ख’बाट मतदान गर्नेछन् । “उहाँ मतदान गरेर भोलि नै काठमाडौं फर्किनुहुन्छ,” परियारले बाह्रखरीसँग भने ।

कांग्रेस नेता रामचन्द्र पौडेलले तनहुको तनहुँको व्यास नगरपालिका–२ स्थित सत्यवती मावि केन्द्रबाट मतदान गर्नेछन् ।

यस्तै, नेता शेखर कोइरालाले विराटनगरबाट मतदान गर्नेछन् । उनले विराटनगर महानगरपालिका–७ स्थित आर्दश मावि केन्द्रबाट मतदान गर्ने उनका सहयोगी दिनेश थपलियाले जानकारी दिए ।

कांग्रेस उपसभापति पूर्णबहादुर खड्काले सुर्खेतको गुर्भाकोट नगरपालिका–८ स्थित सूर्यज्योति उच्च मावि केन्द्रबाट मतदान गर्नेछन् ।

अर्का उपसभापति धनराज गुरुङले स्याङजाको अर्जुनचौपारी गाउँपालिका–२, रानीचरी आधारभूत विद्यालय खाल्डे केन्द्रबाट मतदान गर्ने बाह्रखरीलाई जानकारी दिए ।

महामन्त्री गगन थापाले काठमाडौं महानगरपालिका–३०, मैतीदेवीस्थित मयूरकुण्ड मन्दिर केन्द्रबाट मतदान गर्नेछन् ।

अर्का महामन्त्री विश्वप्रकाश शर्माले झापाको मेचीनगर नगरपालिका–९ स्थित कवि शिरोमणि मावि केन्द्रबाट मतदान गर्नेछन् ।

सहमहामन्त्री भीष्मराज आङ्देम्बेले गृहजिल्ला पाँचथरबाट मतदान गर्नेछन् । उनी मतदानका लागि पाँचथर पुगिसकेका छन् । उनले फाल्गुनन्द गाउँपालिका–१ स्थित शान्ति क्षेत्र प्रावि केन्द्रबाट मतदान गर्नेछन् ।

यस्तै, अर्का सहमहामन्त्री फरमुल्लाह मन्सुरले बाराको कलैया उपमहानगरपालिका–५ स्थित पन्वादेवी मावि केन्द्रबाट मतदान गर्ने जानकारी दिए ।

सहमहामन्त्री महालक्ष्मी उपाध्याय ‘डिना’ले मकवानपुरको भीमफेदी गाउँपालिका–७ स्थित कोगटे पालिका केन्द्रबाट मतदान गर्नेछिन् ।

सहमहामन्त्री किशोर सिंह राठौरले बर्दियाको राजापुर नगरपालिका–६ स्थित मेरा प्रावि केन्द्रबाट मतदान गर्नेछन् ।

अर्का सहमहामन्त्री जीवन परियारले कास्कीबाट मतदान गर्नेछन् । उनले रूपा गाउँपालिका–१, सरस्वती आधारभूत विद्यालय केन्द्रबाट मतदान गर्नेछन् ।

सहमहामन्त्री बद्री पाण्डेले बाजुराको हिमाली गाउँपालिका–४ स्थित शैलेश्वरी मावि केन्द्रबाट मतदान गर्नेछन् ।

खानेपानीमन्त्री समेत रहेका सहमहामन्त्री उमाकान्त चौधरीले बाराको कोल्हवी नगरपलिका–११, बेलवस्थित नेपाल राष्ट्रिय आधारभूत विद्यालय केन्द्रबाट मतदान गर्नेछन् ।

सहमहामन्त्री महेन्द्र यादवले धनुषाको लक्ष्मीनिया गाउँपालिका–३, बनिगामाटोलस्थित जनता आधारभूत विद्यालय केन्द्रबाट मतदान गर्नेछन् ।

कांग्रेसका महत दाजुभाइले गृहजिल्ला नुवाकोटबाटै मतदान गर्नेछन् । पार्टी प्रवक्ता समेत रहेका डा. प्रकाशरण महत र नेता डा. रामशरण महतले नुवाकोटको पञ्चकन्या गाउँपालिका–२ स्थित राष्ट्रिय मावि केन्द्रबाट मतदान गर्नेछन् ।

यस्तै, नेता प्रकाशमान सिंहले काठमाडौं–१६, पकनाजोलस्थित नेपाल युवक मावि केन्द्रबाट मतदान गर्नेछन् ।

कांग्रेस निवर्तमान उपसभापति विमलेन्द्र निधि मतदानका लागि गृहजिल्ला धनुषा पुगिसकेका छन् । उनले नगराइन नगरपालिका–२ स्थित राजेश्वरनिधि उच्च मावि केन्द्रबाट मतदान गर्नेछन् ।

पूर्वउपसभापति गोपालमान श्रेष्ठले स्याङ्जाको पुतलीबजार नगरपालिका–३ स्थित काजीमान हरिटीका मावि केन्द्रबाट मतदान गर्नेछन् ।

कांग्रेस पूर्वमहामन्त्री कृष्णप्रसाद सिटौलाले झापाबाट मतदान गर्नेछन् । भद्रपुर नगरपालिका–१० स्थित वीरेन्द्र उच्च मावि केन्द्रबाट मतदान गर्ने जानाइएको छ ।

निवर्तमान महामन्त्री डा. शशांक कोइरालाले काठमाडौं महानगरपालिका–३, महाराजगन्जचोकस्थित भ्याली स्कुल केन्द्रबाट मतदान गर्नेछन् ।

निवर्तमान सहमहामन्त्री सुनील थापा मतदानका लागि गृहजिल्ला धनकुटाम पुगिसकेका छन् । उनले पाख्रिबास नगरपालिका–८ को सामुदायिक भवन केन्द्रबाट मतदान गर्नेछन् ।