काठमाडौं । राष्ट्रिय जनमोर्चाका अध्यक्ष चित्रबहादुर केसीले पाँच वर्षअघि नेपाली कांग्रेसले गठबन्धनको प्रस्ताव गर्दा आफूले अस्वीकार गरेको बताएका छन् । वाम गठबन्धन बनेको समयमा कांग्रेसले जनमोर्चासँग गठबन्धन गर्न खोजेपनि आफूले अस्वीकार गरेको उनको दाबी छ ।

शुक्रबार काठमाडौंको शान्तिबाटीकामा सत्ता गठबन्धनले आयोजना गरेको सभालाई सम्बोधन गर्दै उनले जनमोर्चा राष्ट्रवादी पार्टी भएकाले गठबन्धन गर्न किन गएको भन्दै पार्टीमाथि निरन्तर आक्रमण भइरहेको पनि बताए । उनले गठबन्धन गरेर जनमोर्चा र चित्रबहादुर केसी सिद्धियो भनेर अनर्गल प्रचार भइरहेको गुनासो गरे । 

“पाँच वर्षअघि वाम गठबन्धन हुँदा पनि कांग्रेसले मलाई बालुवाटारमा बोलाएर गठबनधन गरौँ भनेकै हो । त्यतिबेला बाग्लुङ, अर्घखाँची, डोटी कहाँ कहाँ जित्नुहुन्छ लिनुहोस् भनेर शेरबहादुर रामचन्द्रजीहरूले भनेकै हो,” उनले भने, “तर मानिनँ । म यसपालि गठबन्धनमा जादिन भन्दिएँ । पछि वाम गठबन्धन हुँदै नेकपासम्म बन्यो । दुई तिहाइ मतले सरकार पनि बन्यो । सरकार बनेको तीन वर्षमा देखिहाल्यौँ के भयो । संसद् देख्यो कि ओलीजीले सिद्धयाइहाल्ने नीति लिनुभयो ।”

अध्यक्ष केसीले गठबन्धनभित्र पनि एकमत हुन नसक्ने बताए । फरक मत भइरहेपनि गठबन्धन अहिलेको आवश्यकता भएको दाबी गरे । साथै उनले काठमाडौं जस्तो महानगरपालिकामा हार जितले देशभरीमात्र नभएर अन्तर्राष्ट्रिय रूपमा पनि असर पार्ने बताए ।