काठमाडौं । डेबिड मिल्नरको अविजित ९४ रनप्रेरित गुजरात टाइटन्सले आइतबार राति चेन्नई सुपर किंग्सलाई तीन विकेट हराउँदै इन्डियन प्रिमियर लिग (आईपीएल)को शीर्ष स्थानमा दुई अंकको अग्रता बनाएको छ ।

जितसँगै ६ खेलबाट १० अंक जोडेको गुजरात शीर्ष स्थानमा छ । समान खेलबाट आठ अंक जोडेका लखनउ सुपर जायन्ट, रोयल च्यालेन्जर्स बैंग्लोर र सनराइजर्स हैदरावाद क्रमशः दोस्रो, तेस्रो र चौथो स्थानमा छन् ।

पराजित चेन्नई पुछारबाट दोस्रो स्थानमा छ । चेन्नईले ६ खेलबाट दुई अंक मात्र जोड्न सकेको छ । अंकविहीन मुम्बई इन्डियन्स पुछारमा छ ।

पुणेस्थित महाराष्ट्र क्रिकेट एसोसिएसनको मैदानमा गुजरातले टस जितेर फिल्डिङ गर्ने निर्णय गरेको थियो । त्यसपछि ब्याटिङ गरेको चेन्नईले निर्धारित २० ओभरमा पाँच विकेट गुमाएर १६९ रन बनाएको थियो । १७० रनको लक्ष्य गुजरातले एक बल बाँकी हुँदा सात विकेट गुमाएर पूरा गर्‍यो ।

चेन्नईका ओपनर रितुराज गाइकवाडले ७३ रनको योगदान गरे । अम्बती रायडुले ४६ रन बनाउँदा कप्तान रवीन्द्र जडेजाले अविजित २२ रन बनाए । शिवम दुबेले १९ रन जोडे । अरू खेलाडीले दोहोरो अंकमा रन बनाउन सकेनन् ।

गुजरातका अल्जारी जोसेफले दुई विकेट लिए भने यश दयाल र मोहम्मद सामीले एक/एक विकेट लिए । 

१७० रनको लक्ष्य पूरा गर्ने क्रममा मिल्नरले अविजित ९४ रन बनाए । उनले ५१ बलमा आठ चौका र ६ छक्का प्रहार गरेका थिए । रशिद खानले ४० रन जोडे भने अभिनव मनोहरले १२ र ऋद्धिमन शाहले ११ रन बनाए ।

चेन्नईका ड्वाने ब्राभोले तीन विकेट लिए । महेश थीकशानाले दुई विकेट लिए । मुकेश चौधरी र जडेजाले एक/एक विकेट लिए ।

आईपीएलमा आज राति राजस्थान रोयल्स र कोलकाता नाइट राइडर्सले प्रतिस्पर्धा गर्दै छन् ।