काठमाडौं । शिक्षा, विज्ञान तथा प्रविधिमन्त्री देवेन्द्र पौडेलले विगतका उपलब्धिको रक्षाका लागि अहिलेको पाँचदलीय गठबन्धन भएको बताएका छन् ।

नेकपा (माओवादी केन्द्र) बरेङ गाउँपालिकाले शनिबार आयोजना गरेको प्रशिक्षण कार्यक्रमलाई सम्बोधन गर्दै उनले गणतन्त्रलगायत उपलब्धिको रक्षाका लागि गठबन्धन आवश्यक रहेको औँल्याए ।

माओवादी नेता पौडेलले समृद्धिका लागि समाजवादी क्रान्ति आवश्यक रहेको भन्दै आफ्नो पार्टीले ल्याएको परिवर्तनमा अरू दलले रजाइँ गरेको आरोप समेत लगाए ।

उनले भने, “माओवादीकै उपलब्धिमा टेकेर माओवादीलाई नै गाली गर्नेहरूको कमी छैन ।”

संविधान मिचेर संसद् अन्त्य गर्नेले उल्टै ठूला कुरा गरेको नसुहाउने भन्दै उनले नेकपा (एमाले)का अध्यक्ष केपी शर्मा ओलीप्रति कटाक्ष पनि गरे ।