विराटनगर । कोसी प्रदेशका मुख्यमन्त्री हिक्मत कार्कीले विपक्षी दलसँग छलफल गरेका छन् । प्रधानमन्त्री केपी शर्मा ओलीले मंगलबार कोसी प्रदेशसभा बैठकलाई गर्ने सम्बोधनका विषयमा औपचारिक जानकारी नगराएको भन्दै विपक्षी दलहरूले असन्तुष्टि जनाएका थिए ।

उनीहरूको असन्तुष्टिलाई सम्बोधन गर्न मुख्यमन्त्री कार्कीले नेकपा (माओवादी केन्द्र)का संसदीय दलका नेता इन्द्र आङ्बोसँग विराटनगरमा छलफल गरेका हुन् । मुख्यमन्त्री कार्कीले कमजोरीहरू सच्याएर अघि बढ्ने बताएको नेता आङ्बोले जानकारी दिए ।

राष्ट्रिय प्रजातन्त्र पार्टी (राप्रपा) र नेकपा (एकीकृत समाजवादी)ले आजको बैठकमा अनुपस्थित हुन सक्ने जनाउ दिएका थिए । प्रदेशसभा सचिवालयले दिएको जानकारीअनुसार, आज दिउँसो २ बजे प्रधानमन्त्रीले सभालाई सम्बोधन गर्ने कार्यसूची छ  ।

प्रधानमन्त्री ओली पूर्वाञ्चल विश्वविद्यालयको दीक्षान्त समारोहमा सहभागी भएर दिउँसो सुन्दर हरैँचाबाट विराटनगर आउने तय भएको छ ।