काठमाडौं । माघ १६ गते संस्कृति, पर्यटन तथा नागरिक उड्यन मन्त्री प्रेम बहादुर आलेले पशुपति क्षेत्रभित्र बनाइएका अस्थायी टहरा र पसल १५ दिनभित्र हटाउन निर्देशन दिए । 

मन्त्री आलेको निर्देशनपछि पशुपति क्षेत्र विकास कोषले १५ दिनभित्र पसल र टहरा हटाउन व्यवसायीहरुलाई अल्टिमेटम दिएको छ । 

कोषले यसअघि पसल र टहरा हटाउन कैयौँपटक ताकेता गर्दै आएको छ । तर पशुपति क्षेत्रबाट पसल र टहरा हट्न सकेका छैनन् । कोषका प्रवक्ता रेवतीरमण अधिकारीका अनुसार १५ दिनभित्र हटाउन दिइएको अल्टिमेटम प्रक्रियामा रहेको छ । 

‘‘पसल र अस्थायी टहरा हटाउन १५ दिनको म्याद दिइएको छ । हामीले ताकेता गरिरहेका छौँ । कोषले अल्टिमेटम दिएको पहिलो पटक भने होइन । पटक–पटक यस्ता अल्टिमेटम दिँदै आएका छौँ । यसपल्ट मन्त्रीकै निर्देशन भएकाले हटाउन थप सहयोग पुग्नेछ,” उनले भने । 

कोषले यसअघि उक्त संरचनाहरु हटाउन पटक पटक ताकेता दिँदै आए पनि हटाउन सकेको थिएन । प्रवक्ता अधिकारीले मन्त्री आलेको निर्देशनमा थप सूचना दिएर व्यवसायीलाई हटाउन भनिएको बताए । ‘‘सहमतिमा छोड्ने एउटा पाटो रहन्छ भने अर्को प्रशासनिक पाटोबाट हटाउने भन्ने प्रक्रिया छ । पशुपति क्षेत्रलाई शोभनीय राख्नुपर्छ भन्ने कुरा मुख्य विषय हो,” प्रवक्ता अधिकारीले भने । 

कोषले मन्त्री आलेको निर्देशनमा अव्यवस्थित फुल पसल र अस्थायी टहरा हटाउन स्पस्ट पारेको छ । 

कोषका अनुसार हाल पशुपति क्षेत्रमा २५० भन्दा बढी पसल र स्थायी टहराहरु सञ्चालित छन् । 

कोषको मापदण्डविपरीत स्वीकृति नलिइ बनाइएका पसल र टहराहरु हटाउन मन्त्रीको निर्देशन बमोजिम अघि बढेकाले थप सहज भएको कोषले जनाएको छ । 

कोषले पशुपति क्षेत्रमा गोलाप्रथाबाट पसल र टहरा राख्ने अनुमति दिँदै आएको छ । अनुमतिअनुसार सञ्चालन भइरहेका पसलहरुलाई थप व्यवस्थित बनाउँदै लैजाने कोषको तयारी छ ।