काठमाडौं । राष्ट्रिय खेलकुद परिषद् (राखेप)मा सदस्य सचिव नहुँदा सम्पूर्ण खेल क्षेत्र ठप्प भएको भन्दै राष्ट्रिय तथा अन्तर्राष्ट्रिय खेलाडी संघ, नेपाल ओलम्पियन संघ र राष्ट्रिय खेलकुद परिषदको कर्मचारी संघले बिहीबार खेलकुदलाई चलायमान बनाउन माग गरेका छन् । 

नयाँ खेलकुद ऐनमा राखेपको सदस्यसचिव नभए पनि काम कारबाही अगाडि बढाउने व्यवस्था रहेको तर युवा तथा खेलकुद मन्त्रालयले चासो नदेखएको भन्दै तीन संघले विरोध जनाएका थिए । राखेप परिसरमा बिहीबार खेलाडी तथा कर्मचारीले विरोध प्रदर्शन गरेका हुन् । 

त्रिपुरेश्वरस्थित दशरथ रंगशाला र राखेप परिसरमा आयोजित आन्दोलनमा विभिन्न खेलका खेलाडी, प्रशिक्षक, खेलकर्मी तथा कर्मचारीको उपस्थिति थियो । खेलाडीहरूले दुई हातमा कालो पट्टीले बाधेका थिए । उनीहरूले सदस्यसचिव विवादबारे सर्वोच्च अदालतमा परेको रिटको किनारा लगाउन सम्मानित अदालतसमक्ष आग्रह गर्दै परिषद्को कामकारबाही नियमित सुचारु राख्न ऐनअनुसार व्यवस्था गर्न मन्त्रालयको ध्यानाकर्षण गरेका थिए ।

सरकारले तत्कालीन सदस्य सचिव रमेशकुमार सिलवाललाई गत कात्तिक १ गते बर्खास्त गरेर गत मंसिर १३ गते टंकलाल घिसिङलाई सदस्य सचिवमा नियुक्त गरेको थियो । तर, सिलवालले मन्त्रिपरिषद्को निर्णयविरुद्ध सर्वोच्चमा मुद्दा दर्ता गरेका थिए । सर्वोच्चले सिलवालले दायर गरेको रिटमा पछिल्लो नियुक्ति कार्यान्वयन नगर्न भन्दै अल्पकालीन अन्तरिम आदेश दिएको थियो । 

त्यसपछि खेलकुद ठप्प भएको छ । नवौँ राष्ट्रिय खेलकुद हुने नहुने सुनिश्चित भइसकेको छैन । जसले गर्दा एसियन गेम्स र दक्षिण एसियाली खेलकुद प्रतियोगिताको तयारी प्रभावित बनेको छ भने खेलाडी तथा कर्मचारीको तलब रकम पनि रोकिएको छ । 

तस्बिरहरू : अभिषेक महर्जन/बाह्रखरी