नुरसुल्तान । तीनवटा एसियाली मुलुकका सहरहरूमा अचानक विद्युत आपूर्ति रोकिएपछि लाखौँ मानिस लामो समय ब्ल्याकआउटको मारमा परेका छन् । किर्गिज्स्तान, उज्वेकिस्तान र कजाखस्तानका विभिन्न सहरले सेयर गर्ने पावर लाइन काटिएको थियो ।
विद्युत आपूर्ति रोकिएको कारण व्यापक रूपमा ट्राफिक जाम हुनुका साथै विमानस्थलमा उडान लगायत अन्य सार्वजनिक यातायातमा ढिलाइ भएको थियो ।
यी तीनवटा विघटित सोभियत संघका पूर्व गणराज्यमा सात घन्टा विद्युत आपूर्ति रोकिएको थियो ।
उज्वेकिस्तानको ऊर्जा मन्त्रालयले एउटा ठूलो दुर्घटनाको कारण यो समस्या आएको बताएको छ । यी तीनैवटा मुलुकको एक आपसमा जोडिएको पावर ग्रिड कजाखस्तानबाट जाने सोभियत कालिन पावर लाइन मार्फत जाने रसियाको नेटवर्कसँग जोडिएको छ ।
रोयटर्सका अनुसार विद्युत समस्या प्रभावित क्षेत्रका थुप्रै वासिन्दा खानेपानी, हिटिङ, पेट्रोल पम्प र इन्टरनेट सेवाबाट बन्चित हुनपुगेको जनाएको छ ।
बीबीसीबाट ।
