विराटनगर । प्रदेश नम्बर–१ का मुख्यमन्त्री राजेन्द्र राईले धर्म सकारात्मक सोच र सच्चरित्र विकासमा सहयोगी हुनुपर्ने बताएका छन् ।

शनिबार विराटनगरमा श्रीकृष्ण प्रणामी युवा परिषद्को १ नम्बर प्रदेश अधिवेशन उद्घाटन कार्यक्रममा बोल्दै उनले धर्म सबैको मनमा उत्पन्न हुने भएकोले अन्धता र विकृत हुन नहुनेमा जोड दिए ।

मुख्यमन्त्री राईले भने, “मानव र समाज हितको लागि धर्म सहयोगी हुनुपर्छ । दुर्व्यसन ठूलो चुनौतीको रूपमा आएकोले सच्चरित्र विकासमा समेत सहयोगी बन्न हातेमालो आवश्यक छ ।’’ उनले धर्म समाज रूपान्तरणमा सहयोगी हुनुपर्नेमा पनि जोड दिए ।

संविधानले धार्मिक समानताको कुरा गरेको र यसको सक्कली भाव भनेको आस्तिक पनि हुन पाइने र नास्तिक पनि हुन पाइने भन्दै उनले राज्यले सबै धर्मलाई समान व्यवहार गर्ने बताए । धर्मको आधारमा भेदभाव गर्न नहुने उनले उल्लेख गरे ।

कार्यक्रममा श्रीकृष्ण प्रणामी परिषद्का अध्यक्ष जगदीशचन्द्र शर्माले धार्मिक सहिष्णुताका लागि युवा परिचालन आवश्यक भएको बताए । जातीय विभेद र छुवाछूतको परिपाटी विस्तारै समाजबाट हट्न थालेको उनको भनाइ छ ।