काठमाडौं । नेकपा (एकीकृत समाजवादी) निकट अनेरास्ववियूका अध्यक्ष सुदेश पराजुलीले आफूहरूको संगठनमा विद्यार्थीको आकर्षण बढेको बताएका छन् । अनेरास्ववियू केन्द्रीय कमिटीले बिहीबार थापाथली क्याम्पसमा आयोजना गरेको कार्यक्रममा पराजुलीले आफूहरूप्रति विद्यार्थीको आकर्षण बढेको बताएका हुन् ।
उनले अब 'मण्डले प्रवृत्ति' भएका गठनहरूलाई विद्यार्थीले बहिस्कार गर्ने पनि बताए । “अब मण्डले प्रवृत्ति भएका विद्यार्थी संगठन हुँ र नेता हुँ भन्ने संगठनहरूलाई आम विद्यार्थीहरूले बहिस्कार गर्नेछन् । हामीप्रति विद्यार्थीको आकर्षण बढ्दो छ,” उनले भने ।
उनले आफ्ना विद्यार्थी नेता कार्यकर्तालाई विद्यार्थीको एजेन्डामा रही काम गर्न आग्रह गरे ।
सो अवसरमा नेकपा एमाले निकट अनेरास्ववियुका सचिवालय सदस्य आर्जन वाग्लेसहित विभिन्न विद्यार्थी नेताहरू अनेरास्ववियूमा प्रवेश गरेको अनेरास्ववियूका उपमहासचिव अशोक थापाले जानकारी दिए ।
