विराटनगर । बाढीले बगाएर मृत्यु भएका विराटनगर–१ का २१ वर्षीय सञ्जित कामतका आफन्तलाई काजकिरियाखर्चका लागि विराटनगर महानगरपालिकाले आइतबार ५० हजारको चेक प्रदान गरेको छ । 

महानगरपालिको विपद व्यवस्थापन समितिको बैठकबाट गत कात्तिक २ र ३ गते परेको अविरल वर्षाका कारण आएको बाढीबाट मृत्यु भएका परिवारलाई राहत दिने निर्णय गरेको थियो । 

विराटनगर–१ का कामत, विराटनगर–५ का ४१ वर्षीय सञ्जय राई र विराटनगर–१२ का इसान भुजेलका आफन्तलाई किरियाखर्चका लागि जनही ५० हजार रूपैयाँ उपलब्ध गराइएको महानगरले जनाएको छ । 

कात्तिक ३ गते डुबानमा परेको घरभित्रबाट सामान निकाल्ने क्रममा सिंघिया खोलाको बाढीले कामतलाई बगाएको थियो । ३ दिनपछि उनको शव परोपकारघाट छेउमा फेला परेको थियो ।   

विराटनगर महानगरपालिकाकोतर्फबाट आइतबार मेयर भीम पराजुलीले विराटनगर–१ स्थित धर्मशाला चौकमा बाढीले बगाएर निधन भएको कामतको घरैमा पुगेर उनका बुवा बैजनाथ कामतलाई किरियाखर्चका लागि ५० हजारको चेक प्रदान गरेका हुन् ।

मेयर पराजुलीले जीवनको अगाडि पैसाको मूल्य नभएपनि मजदूरी गरेर खाने कामतका परिवारलाई काजकिरियाका लागि प्रदान गरिएको रकमले केहि मद्दत मिल्ने बताए ।

वडा नंं १ का वडाध्यक्ष उद्धव अर्यालले जनप्रतिनिधि आपतको बेला दुखी पीडितको घरमा पुग्नु पर्ने बताए । बाढीका कारण मृत्युवरण गरेका राई र भुजेलका आफन्तलाई सोमबार ५० हजारको काजकिरिया खर्च वापतको चेक प्रदान गरिने भएको छ ।