काठमाडौं । नेपाली कांग्रेसको १४ औँ महाधिवेशन अन्तर्गत काठमाडौं जिल्लाको वडा अधिवेशन ५ असोजमा हुने भएको छ । केन्द्रीय निर्वाचन समितिले खटाएको निर्वाचन अधिकृत नरहरि आचार्य कार्यस्थलमा पुगेसँगै अधिवेशनको तयारी सुरु भएको हो ।
 
निर्वाचन अधिकृत आचार्य र जिल्ला कार्यसमिति सभापति कृष्ण बानियाँ सवुज मिलेर मतदान अधिकृत चयन गर्न थालेका छन् । १३८ वडा रहेको काठमाडौंमा मतदान बन्ने आकाक्षिंहरू तीन सयको हाराहारीमा रहेको सभापति बानियाँले बताए । 

“मतदान अधिकृत बन्न चाहानेको संख्या धेरै छ । हामी आजै टुंग्याउन लागि परेका छौँ,” उनले भने, “निर्वाचन अधिकृतलाई सबै अधिकार छ । समस्या परे म आफैँ उपस्थित हुन्छु ।” 

प्रजातान्त्रिक कानुन व्यवसायी संघ र नेपाल शिक्षक संघबाट मतदान अधिकृत तोकिने छन् । 

संघीय राजधानी काठमाडौंमा क्रियाशील सदस्यताको सूची सार्वजनिक नहुँदा १८ भदौमा हुनुपर्ने वडा अधिवेशन रोकिएको थियो । मंगलबारमात्र क्रियाशील विवाद समाधान कार्यदलले क्रियाशील सूची निर्वाचन समितिलाई बुझाएपछि अधिवेशन सुनिश्चित भएको हो । सूची सार्वजनिक भएपश्चात् बुधबार केन्द्रीय निर्वाचन समितिले काठमाडौंका लागि वरिष्ठ अधिवक्ता नरहरि आचार्यलाई निर्वाचन अधिकृत तोकेको थियो । 

कार्यभार सम्हालेपछि निर्वाचन अधिकृत आचार्यले जिल्ला कार्यसमितिसँग आज बैठक सम्पन्न गरेका हुन् । बैठकले ५ असोजमा अधिवेशन गर्ने निर्णय गर्दै मतदान अधिकृत तोक्ने निर्णय गरेको बानियाँले बताए । 

१० निर्वाचन क्षेत्र भएको काठमाडौंमा ११ वटा नगरपालिका रहेको छन् । जसमा १ सय ३८ वडा रहेको छ । आज भएको छलफलले मंगलबार सबै वडाको अधिवेशन सक्ने निर्णय भएको हो ।