काठमाडौं । पर्यटन क्षेत्रका छाता संगठनहररूले खोप उपलब्ध गराउन माग गर्दै स्वास्थ्य राज्यमन्त्री उमेश श्रष्ठलाई ज्ञापनपत्र बुझाएका छन् ।

कोरोनाका कारण दुई वर्षदेखि ठप्प र शिथिल बनेको पर्यटन क्षेत्रको पुनः सुरुवातका लागि खोप मात्रै एक विकल्प रहेको भन्दै छिटोभन्दा छिटो सबै नागरिकलाई खोप लगाउने वातावरण मिलाउन आग्रह गरे ।

व्यवसायीहरूले खोपको मात्रा पूरा लगाएका र नेपाल घुम्न चाहने पर्यटकलाई पीसीआर गराई क्वारेन्टिन बस्नुपर्ने व्यवस्था हटाउन पनि माग गरेका छन् ।

कोरोना पोजिटिभ देखिएका पर्यटकलाई अनिवार्य क्वारेन्टिनको व्यवस्था गरिए पनि नेगेटिभ रिपोर्ट आएका पर्यटकलाई सहजताका साथ नेपाल घुम्ने वातावरण मिलाई पर्यटन क्षेत्रलाई पुनः चलायमान गर्नुपर्नेमा व्यवसायीहरूले जोड दिएका छन् ।

त्यसैगरी, स्वास्थ्य सुरक्षा प्रोटोकल कार्यान्वयन गर्न र प्रभावकारी बनाउन देशव्यापी रूपमा तालिम तथा अनुगमनको व्यवस्था गरिनुपर्ने उनीहरूले माग गरेका छन् ।

ज्ञापनपत्र बुझ्दै स्वास्थ्य राज्यमन्त्री श्रेष्ठले पर्यटन क्षेत्रको समस्यासँग आफू जानकार रहेको र फ्रान्टलाइनरलाई खोप लगाउन प्रयास गरिरहेको बताए । क्वारेन्टिनको व्यवस्था हटाउन आफूले पनि कुरा राखिरहेको र केही दिनभित्रमा नै निर्णय गरेर सूचना निकालिने उनले बताएको टानका अध्यक्ष खुमबहादुर सुवेदीले बताए ।

“पर्यटन व्यवसायीको माग जायज भएको र आर्थिक हिसाबले यस क्षेत्रले भोग्नुपरेको समस्यालाई छिट्टै नै सम्बोधन गरिनेसमेत मन्त्री श्रेष्ठले प्रतिबद्धता जनाउनुभएको छ,” सुवेदीले भने ।

विशेष पर्यटकीय गन्तव्यस्थलमा सर्वसाधारणलाई केन्द्रित गरेर खोप लगाउने र पर्यटकीय गन्तव्यहरूलाई खुलाउन आफू दृढ भएको र योजना बनाएर काम गरिरहेको मन्त्रीको भनाइ थियो ।

पर्यटन क्षेत्रसँग आबद्द यी संस्थाहरूले बारम्बार क्वारेन्टिन हटाउनुपर्ने माग र खोपको माग गर्दै ज्ञापनपत्र बुझाउँदै आएका छन् । तर, कुनै सरकारले  सकारात्मक निर्णय गरेको देखिँदैन।

सेप्टेम्बर र अक्टोबरमा पनि पर्यटकीय क्षेत्र र संस्थाहरू खुलेनन् भने पर्यटन व्यवसायीहरू पलायन हुने अवस्थामा पुगिसकेको र व्यवसायी पलायन हुँदा यहाँबाट रोजगारी पाएका जनशक्तिसँगै सबैको लगानी नै खतरामा पर्ने सुवेदीले बताए ।