काठमाडौं । हलिउड अभिनेत्री एन्जेलिना जोली १८ मिनेटसम्म मौरीले छोपिएर बसिन् । हालै एउटा म्यागजिन कभरका लागि फोटोसुट गराउन उनले यसो गरेकी हुन् ।

अभिनेत्री जोलीले नेसनल जियोग्राफिक म्यागजिनका लागि यो फोटोसुट गराएकी हुन् । विश्व मौरी दिवसको उपलक्ष्यमा मौरी संरक्षणको पहललाई प्रमोट गर्न उनको यो सुट गरिएको थियो ।

फोटोसुटमा अभिनेत्रीको हात, काँध र अनुहारभरि मौरी हुन्छ । तर, उनी केही नभएको जस्तो क्यामेरामा हेरेर पोज दिइरहेकी हुन्छिन् । मौरीले अभिनेत्री र सेटमा भएका कसैलाई पनि हानि नगरोस् भन्नेमा फोटोग्राफर ड्यान विन्टर सावधान थिए । सुटका लागि इटालियन मौरीहरु ल्याइएको थियो र अभिनेत्री जोली १८ मिनेटसम्म नहल्ली उभिएकी थिइन् ।

फोटोग्राफर ड्यानले भने, “लामो समय बिकिपरको अनुभव भएका कारण मलाई जब यो कार्यभार दिइयो, मेरो पहिलो चिन्ता भनेकै सुरक्षा थियो । महामारीको बेला एन्जेलिनासँग काम गर्दा जीवित मौरीले सुट अझै जटिल बनायो । मलाई थाहा थियो, यो जटिलताबीच पनि राम्रो फोटो निकाल्नका लागि ४० वर्षअघि अभेडोनले प्रयोग गरेको ‘द बिकिपर’को आइकोनिक पोट्रेटको शैली फलो गर्नुपर्छ । मलाई लाग्छ, विश्व मौरी दिवसमा हाम्रो यो उपहार फोटोग्राफीको इतिहासको जरा बनेर बस्नेछ ।”

नेसनल जियोग्राफिकका अनुसार युनेस्कोले लञ्च गरेको पाँच वर्षीय प्रोजेक्टका लागि अभिनेत्री जोलीले सम्झौता गरेकी छन् । जसपश्चात् जियोग्राफिकले उनलाई मौरीहरुका महिलामा ‘हजुरआमा’को नाम दिएको छ ।

युनेस्कोको यो पहलबारे ४५ वर्षीया अभिनेत्री जोली भन्छिन्, “विश्वमा भइरहेका यी सबैबारे चिन्तित भइरहँदा यो (मौरी संरक्षण) एउटा मुद्दा हो, जुन हामीले व्यवस्थापन गर्न सक्छौँ । हामी सबैले आफ्नो–आफ्नो तवरबाट सक्दो गर्न सक्छौँ ।” इन्डियन एक्सप्रेसबाट ।