काठमाडौं । महानगरीय ट्राफिक प्रहरी महाशाखाले ट्राफिक नियम उल्लंघन गरेबापत तिर्नुपर्ने जरिवानालाई अनलाइनमार्फत भुक्तानी गर्ने प्रणालीको व्यवस्था गरेको छ । आफूले दिने सेवालाई अझ प्रभावकारी र सहज तरिकाले उपलब्ध गराउने उद्देश्यले ट्राफिक प्रहरीले अनलाइनमार्फत भुक्तानी गर्ने प्रणालीको विस्तार गरेको हो । 

महाशाखाका प्रमुख प्रहरी वरिष्ठ उपरीक्षक जनक भट्टराईले यसअघि नै सुरु भइसकेको अनलाइन भुक्तानी सेवालाई थप प्रभावकारी बनाइएको बताए । उनकाअनुसार अनलाइन सेवालाई थप सहज, सरल र सुबिधायुक्त बनाउन आजदेखि आफ्नै बैंक खाताबाट सिधै जरिवाना तिर्न सकिने व्यवस्था मिलाइएको छ । यसले जरिवाना तिर्न बैंकमा लाइन बस्नुपर्ने बाध्यताको अन्त्य गर्ने विश्वास गरिएको छ ।

आजदेखि थप ४५ वटा बैंक तथा वित्तीय संस्था र ७ वटा अनलाइन भुक्तानी सेवा प्रदायक संस्थाहरूबाट सिधै जरिवाना भुक्तानी गर्न सकिने ट्राफिक प्रहरीले जनाएको छ ।