काठमाडौं । काठमाडौं उपत्यकामा आज बिहानको भिजिविलिटी ४५ सय मिटर रहेको छ । बिहीबार यही समय काठमाडौंको भिजिविलिटी दुई हजार मिटर थियो । बिहीबारको तुलनामा आज वायु प्रदूषण कम छ ।
“बिहीबारको तुलनामा आज वायु प्रदूषण केही कम छ । तर, यसको अर्थ अब वायु प्रदूषण हटेर गयो भन्ने होइन । कम्तीमा तीन दिन वायु प्रदूषण केही कम हुने छ,” मौसमविद् राजु प्रधानाङ् भन्छन् ।
तीनदिनसम्म पनि ठूलो पानी परेन र ठूलो हावाहुरी चलेन भने पुनः वायु प्रदूषण बढ्ने छ । लगातार डडेलो लाग्ने तर पानी नपरेका कारण केही समय यता काठमाडौंलगायत ठूला सहर तथा डडेलो लागेका स्थान तथा त्यसको वरपरका ठाउँमा वायु प्रदूषण उच्च हुँदै आएको छ ।
उच्च वायु प्रदूषणकै कारण अघिल्लो हप्ता सरकारले चार दिन देशभरका विद्यालय बन्द गरेको थियो । स्वास्थ्य मन्त्रालयले आँखा र नाक पोल्ने जस्ता समस्या देखिनेभन्दै सचेत रहन आग्रह गरेको थियो । अत्यावश्यक काम परेमात्रै घरबाहिर निस्किन मन्त्रालयले अनुरोध गरेको थियो ।
देशका विभिन्न ठाउँमा एअर क्वालिटी इन्डेक्स (एक्यूआई) तीन सयभन्दा माथि पुगेपछि मन्त्रालयले नागरिकलाई यसबाट बच्न सचेत गराएको थियो । एक्यूआई तीन सयमाथि पुग्नु भनेको स्वास्थ्यका लागि खराब अवस्था रहेको वातावरण विभागले बताउँदै आएको छ ।
फाइल तस्बिर