इटहरी । सुनसरीको इटहरी चौरस्ताको सहर हो । कोसी पहाडी क्षेत्र उक्लिन होस् अथवा विराटनगर हुँदै भारत छिर्न इटहरी पुग्नै पर्छ । काठमाडौं र पश्चिम नेपाल अनि झापातर्फ लाग्न पनि यो सहर भएर जानुपर्छ ।
यतिले मात्र नभएर इटहरी सबैतिरका मानिसहरू बसाईं सरि आएको सहरको रुपमा पनि परिचित छ । एक समय यहाँका फराकिला र चिल्ला सडकको खुबै चर्चा हुन्थ्यो । समुदायको समेत लगानीमा निर्माण गरिएका भरपर्दा र टिकाउ सडकले राष्ट्रिय रुपमै चर्चा कमाएको थियो । सडकको रेखदेख गर्न हेरालु खटिन्थे । दायाँबायाँ लगाइएको आशोकका बिरुवा र रंगीबिरंगी फूलले सहरको सौन्दर्य खुलेको देखिन्थ्यो ।
तर, हिजोआज इटहरीको परिवेश बदलिएको छ । यात्रु इटहरी भएर यात्रा गर्न नपरे हुन्थ्यो भन्ने कामना गर्न थालेका छन् । कारण तिनै हिजो चर्चा कमाएका सडक नै बनेका छन । प्रवेश गर्ने मूल (निर्माणाधीन ६ लेन) सडककै कारण मानिसहरू इटहरीतर्फ यात्रा गर्न झिँझो मान्न थालेका छन् । निर्माणको ढिलासुस्ती र सडकमा उड्ने धुलोले इटहरीका बासिन्दालाई त सास्ती छँदै छ बाहिरबाट यही गन्तव्य भएर अन्यत्र जानेलाई पनि त्यहाँ पुग्न नपरे हुन्थ्योजस्तै भएको छ । निर्माण कम्पनीले सडकमा पानी नहाल्ने र धुलोले बजारलाई पुर्ने क्रमले यात्रुलाई पर्नसम्म पर्का परेको छ ।
इटहरी चोकमा भेटिएका झापा दमकका विष्णु पौडेलले भने, “खनार जान मोटरसाइकलमा हिँडेका थियौं साह्रै धुलो खान पर्यो । इटहरी चोकको त हविगत पो देखियो ।” निर्माणाधीन ६ लेन सडक खण्डको टेलिकम कार्यालयदेखि नेपाली सेनाको पृतनासम्मको क्षेत्रमा उड्ने धुलोले इटहरी पुरिने गरेको छ ।
हेरौं थप तस्बिर :