काठमाडौं । प्रधानमन्त्री कप एकदिवसीय क्रिकेट प्रतियोगिताको समाचार संकलनका लागि मूलपानी क्रिकेट मैदान गएका खेलकुद पत्रकारहरुमाथि दुर्व्यवहार भएको छ ।

वाग्मती प्रदेश क्रिकेट संघका सदस्य अजय वीर पाण्डेले मंगलबार मूलपानी क्रिकेट मैदान पुगेका पत्रकारहरुमाथि दुर्व्यवहार गरेका हुन् ।

कर्णाली प्रदेश र गण्डकी प्रदेशबीचको खेल सकिएपश्चात पोस्ट म्याच प्रेजेन्टेसनमा पाण्डेले खेल पत्रकारमाथि अभद्र व्यवहार गरेका थिए ।

प्रतियोगितामा तोकिएको स्थानमै कर्णालीका प्रशिक्षकसँग अन्तर्वार्ता लिने क्रममा पाण्डेले अभद्र व्यवहार गरेका हुन् ।

उनी प्रतियोगितामा एसीयू कमिटी सदस्यसमेत छन् । अन्तर्वार्ताका क्रममै अभद्र व्यवहार गरेका पाण्डेले फर्कने क्रममा समेत खेल पत्रकारमाथि थप अभद्र गरेका थिए । पत्रकारले प्रतिप्रश्न गर्ने क्रममा उनले धम्कीको भाषा प्रयोग गरेका थिए ।

दुर्व्यवहारप्रति नेपाल खेलकुद पत्रकार मञ्चले गम्भीर ध्यानाकर्षण भएको जनाउँदै दोषीलाई कारबाहीको माग पनि गरेको छ ।