बंगुल । अफ्रिकन मुलुक सेन्ट्रल अफ्रिकन रिपब्लिकका नोभेल कोरोना भाइरसविरुद्ध लड्न ५० लाख जनताका लागि तीन भेन्टिलेटरमात्र छन् ।
नर्वेजियन शरणार्थी परिषद्ले मंगलबार एक विज्ञप्ति जारी गर्दै मुलुकमा कोरोनाविरुद्ध लड्नका लागि तीनवटा मात्रै भेन्टिलेटर भएकोले निकै कठिने हुने बताइएको छ । "५० लाख जनताका लागि तीनवटा मात्र भेन्टिलेटर हुनु भनेको मुलुक विपत्तीमा पर्नु हो," शरणार्थी परिषद्का निर्देशक डेभिड माननले जारी गरेको विज्ञप्तिमा भनिएको छ ।
"सेन्ट्रल अफ्रिकन रिपब्लिकमा कोरोनाले भाइरसले निकै ठूलो संकट निम्त्याउने सम्भावना छ । त्यसकारण मुलुकले पहिले पूर्वसावधानी अपनाउनु निकै आवश्यक छ ।" सेन्ट्रल अफ्रिकन रिपब्लिकमा हालसम्म ६ जना कोरोना संक्रमित भेटिएका छन् । उनीहरु बाहिबाट आएका मानिसहरु रहेको बताइएको छ । तर, परीक्षण अभावका कारण अधिकांश संक्रमितहरु पुष्टि हुन नसकेको बताइएको छ ।
"विश्वका विकसित र हजारौं भेन्टिलेटर भएका मुलुकहरु कोरोनाका कारण कहरमा छन् भने गरिब मुलुक जस्तै सेन्ट्रल अफ्रिकन रिपब्लिकले कोरोनाको सामना कसरी गर्ला ?," म्याननले जारी गरेको विज्ञप्तिमा भनिएको छ । - सीएनएन
