काठमाडौं । सिङगिङ रियालिटी शो ‘द भ्वाइस अफ नेपाल’ सिजन–२ मा  दुईजना कोच परिवर्तन हुने भएका छन् । सिजन वानमा कोचका रुपमा रहेका दीप श्रेष्ठ, सनुप पौडेल, अभया सुब्बा र प्रमोद रहेका थिए । 

उक्त चारजना मध्ये दुईजना दीप श्रेष्ठ र प्रमोद खरेल सिजन–२ मा कोचकै रुपमा यथावत रहेपनि बाँकी दुईजना अभया सुब्बा र सनुप पौडेल भने बाहिरिने स्रोतले बताएको छ । 

उनीहरुका ठाउँमा राजु लामा र आस्था राउत कोचका रुपमा ‘द भ्वाइस अफ नेपाल’को सिजन–२ मा भित्रिने स्रोतले बताएको छ । यद्यपि यसबारे आयोजकले भने घोषणा गरिसकेको छैन । 

अभया सुब्बा सिजन–१ को ‘ग्रान्ड फिनाले’मा सहभागी नभएका कारण ‘हेडक्वाटर’ले नै असन्तुष्टि जनाएका कारण उनको विकल्प खोज्नु परेकोे ‘भ्वाइस अफ नेपाल’का निर्देशक लक्ष्मण पौडेलले बताए । 

उनले दुईजना मध्ये बाँकी एक कोच को बाहिरिँदै छ र कोको आउँदैछन् त्यसबारे निर्देशक पौडेल बोल्न चाहेनन् । 

‘द भ्वाइस अफ नेपाल’ सिजन–२ असार दोस्रो हप्ताबाट प्रशारण हुँदैछ । ‘डिजिटल अडिशन’ सम्पन्न गरिसकेको ‘द भ्वाइस अफ नेपाल’ले उक्त अडिशनबाट ११० जना प्रतिस्पर्धी छनोट गरिसकेको छ । निर्देशक पौडेलका अनुसार डिजिटल अडिशनमा दुई हजार दुई सय सहभागी भएका थिए । 

‘ब्लाइन्ड अडिशन’को सुटिङ अबको केही दिनमा शुरु हुँदैछ । धुम्बाराहीमा रहेको स्टुडियोमा ब्लाइन्ड अडिशनको सुटिङ हुनेछ  । लाइभ हेर्न चाहनेले उक्त सुटिङ हेर्न सक्ने निर्देशक पौडेलले बताए । ब्लाइन्ड अडिशनमा २२ हजारले सहभागिताका लागि आवेदन दिएका थिए । पहिलो सिजनमा १२ हजार सहभागी भएका थिए ।  

स्टुडियो निर्माणका लागि दुई करोड रुपैयाँ लागेको पौडेलको भनाइ छ । 

गत वर्ष ‘ब्लाइन्ड’, ‘ब्याटल’ र ‘लाइभ’ शो हुँदै फिनाले भएकोमा सिजन–२ मा ‘नक आउट चरण’ पनि थपिएको छ । सिजन–२ मा ‘लाइभ शो’मा एकै दिन गत सिजनमा जस्तो चार जना बाहिरिने छैनन् । “गत वर्ष लाइभ शोमा एकै दिन चार जना आउट हुँदा राम्रो भएन भन्ने गुनासो आएकाले यसपटक प्रत्यक ‘लाइभ शो’मा एक जनाका दरले आउट हुने ‘फम्र्याट’ ल्याउँदैछौं,” निर्देशक पौडेलले भने । यो वर्ष ‘नक आउट’ चरणमा धेरै बाहिरने छन् । 

कार्यक्रम ३२ वटा श्रृंखला प्रशारण हुनेछ ।