काठमाडौं । सेयर बजार अत्यन्त सुस्त देखिएको छ । सेयर बजारमा साताभर २२ अंकको गिरावट आएसँगै कारोबार रकम पनि न्यून हुनुले बजार अपेक्षाकृत रुपमा अगाडि बढ्न नसकेको संकेत गर्दछ ।

बजारमा कारोबार हुने अधिकांश कम्पनीहरुले चालु आर्थिक वर्षको दास्रो त्रैमासको अपरिष्कृत वित्तीय विवरण सार्वजनिक गरिसकेका छन् । सरकार र विभिन्न निकायले पनि बजारलाई सकारात्मक प्रभाव पार्ने नीतिगत व्यवस्था गरिसकेका छन् ।

तर, सेयर बजार अझै पनि सुस्त छ । सेयर कारोबार अझै सुस्त हुँदा बजारले उल्लेख्य फड्को मार्न सकेको छैन । विभिन्न तहका नीतिगत सुधार र अनलाइको पूर्ण कार्यान्वयनले लगानीकर्ता दिगो रुपमा खुसी हुन नसकेको देखिन्छ ।

लगानीकर्तामा अझै अन्योल रहँदा यस साताभर धितोपत्र बजारमा नेप्से परिसूचक २२.०६ अंकले घटेको छ । साताभर एक दिनमात्र बढेको नेप्से परिसूचक समग्रमा ओरालो लागेको हो ।
पछिल्लो समय लगानीकर्तामा रहेको अन्योलको कारण बजार नकारात्मक देखिएका जाककारहरुले बताएका छन् । यसअघि बजारमा लगानीकर्तासँग सेयर किन्ने पैसा अभाव भएको भनिएको थियो । उक्त समय लगानीकर्तासँग लगानी गर्ने रकमको अभाव हुुनु, बुकिङ क्लोजको असर, ब्याजदर कम नहुनु आदि कारणले लगानीकर्ता हौसिन सकेका थिएनन् ।

तर, अहिले बजारमा लगानीयोग्य रकम बढेको बताइएको छ । राष्ट्र बैंकले बजारको माग पूर्ति गर्न केही तरलता पठाएको छ । हाल बजार बढ्न नसक्नुका कारण सेयर बजारमा थपिँदो रहेको नयाँ सेयर नै रहेको मानिएको छ । बजारमा सेयरको संख्यामात्र बढिरहँदा लगानीकर्ताको संख्या बढेको छैन । यसो त पछिल्लो समय बैंकहरुले ब्याजदर पनि लगानीकर्ताका लागि समस्या रहेको बताएको छ ।

यस्तो रह्यो साता

नेप्से २२ अंकले घट्यो, कारोबार रकम डेढ अर्ब

यससाता पनि सेयर बजारमा भारी गिरावट देखिएको छ । सुरुको दिनमै १७ अंकले घटेको सेयर बजार तेस्रो दिन समान्य बढ्न खोजेपनि त्यो प्रयास विफल रह्यो । चौथो र पाँचौं दिन पनि घटेर सेयर बजार बन्द हुँदा साताभरको समग्र दिशा सकारात्मक हुन नसकेको हो ।

सेयर बजारमा यससाताको कूल कारोबार रकम मुस्किलले डेढ अर्ब पुगेको छ । कारोबार रकम अघिल्लो साताभन्दा १२.४२ प्रतिशतले बढेर १ अर्ब ५० करोड ४४ लाख रुपैयाँमा कायम भएको हो ।

यसक्रममा सेयर बजारमा १ सय ८७ कम्पनीका २७ हजार ६ सय ८६ कारोबार भए । यसक्रममा ५१ लाख ३ हजार कित्ता सेयर कारेबारमा आए ।

अघिल्लो साता बजारमा १ अर्ब ३३ करोड रुपैयाँ बराबरको सेयर बिनबेच भएका थिए । नेप्सेको उताररचढाव कायम रहँदा बजारको औसत कारोबार ३० करोड कायम भएको हो ।
यससाता पहिलो दुई दिनको गिरावट नेप्से परिसूचकलाई भारी पर्यो । अघिल्लो साताभर ११ अंकले घटेको थियो ।

नेपाल स्टक एक्स्चेन्जका अनुसार पहिलो दिनको सुरुवाती बिन्दुभन्दा नेप्से १.९ प्रतिशत (२२.०६ अंक)ले घटेर परिसूचक १ हजार १ सय ३९ दशमलव ५९ अंकमा पुगेको छ । 
नेप्से बढ्दा यससाता ‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा १.७ प्रतिशतले घटेर २४२.६१ अंकमा आइपुगेको छ ।

नेप्से घट्दा यससता लगानीकर्ताले साढे ३० अर्ब रुपैयाँ गुमाएका छन् । साताभर लगानीकर्ताको कूल सम्पत्ति १.८८ प्रतिशतले घटेको हो । अघिल्लो साताको अन्तिम दिन १४ खर्ब १७ अर्ब २१ करोड रुपैयाँ रहेको कूल बजार पुँजीकरण साताको अन्तिम दिन १३ खर्ब ९० अर्ब ६३ करोड रुपैयाँमा कायम भएको छ ।

यससाता कारोबार रकमका आधारमा माथिल्लो तामाकोशी जलविद्यूत् कम्पनी अग्रस्थानमा रह्यो । कम्पनीका साताभर ५ हजार ९ सय ७३ कारोबारमार्फत् १० करोड ४४ लाख रुपैयाँका ४२ हजार कित्ता सेयर किनबेच भए । कारोबार संख्यामा पनि माथिल्लो तामाकोसी नै अग्रस्थानमा रहेको हो ।

यससाता नेप्सेमा हाम्रो विकास बैंकका १ लाख १८ हजार कित्ता बोनस तथा महालक्ष्मी सिटि एक्स्प्रेस फाइनान्सका २५ लाख कित्ता र सहारा विकास बैंकका ९ लाख ३ हजार कित्ता हकप्रद सेयर नेप्सेमा सूचीकृत भए ।