काठमाडौं । ऐतिहासिक–सामाजिक–सांस्कृतिक सद्भाव कायम गर्न आह्वान गर्दै काठमाडौं–जनकपुर साइकल यात्रा सुरु भएको छ । हिन्दू धर्मको पवित्र तीर्थस्थल काठमाडौंको पशुपतिनाथबाट साइकल यात्रा शुभारम्भ गरिएको हो । 
आइतबार बिहान पशुपतिनाथ परिसरमा एक कार्यक्रमका बीच उपप्रधानमन्त्री एवम् रक्षामन्त्री इश्वर पोखरेलले राष्ट्रिय झण्डा र रुद्राक्षको माला साइकल यात्रीलाई लगाइदिएर सो साइकल यात्राको शुभारम्भ गरे । ८५ जना साइकल यात्री सहभागी रहेको सो साइकल यात्रा वीर पुर्खाहरुले तत्कालीन अंग्रेज शासकलाई हराएको ऐतिहासिक स्थल सिन्धुलीगढी हुँदै धार्मिक नगरी जनकपुरस्थित रामजानकी मन्दिरमा पुगेर समापन हुनेछ । जनकपुरमा विवाह पञ्चमीको अवसर पारेर सो साइकल यात्रा आयोजना गरिएको हो । 
आइतबार पशुपतिनाथबाट सुरु भएको सो साइकल यात्रा ४ दिनमा २ सय २५ किलोमिटर पार गरी जनकपुरस्थित जानकी मन्दिरमा पुगेर समापन हुनेछ । पशुपति क्षेत्र विकास कोषको संयोजनमा आयोजना गरिएको साइकल यात्रीलाई कमलामाई नगरपालिका, सुनकोशी नगरपालिका, बर्दिबास नगरपालिकाले पनि आ–आफ्नो क्षेत्रमा पुगेपछि स्वागत गर्ने कार्यक्रम छ । सामाजिक तथा सांस्कृतिक सदभाव कायम गर्न विगत केही वर्षयता काठमाडौं–जनकपुर साइकल यात्रा आयोजना हुँदै आएको छ ।