काठमाडौं । नेपाली टिमका मुख्य प्रशिक्षक भिन्चेन्सो अल्बर्टो एनेसले खेलाडी विदेशिनु नेपाली फुटबलका लागि दुःखको कुरा भएको बताएका छन् ।

प्रधानमन्त्री त्रिदेशीय कपमा मंगलबार भुटानसँग १–१ को बराबरीमा रोकिएपछि नेपाली टिमका प्रशिक्षक एनेसले यस्तो प्रतिक्रिया दिएका हुन् ।

त्रिपुरेश्वरस्थित दशरथ रंगशालामा भएको खेलमा भुटानले अग्रता लिएपनि अन्तिम मिनेटमा नेपालबाट गोल व्यहोर्दा बराबरीमा रोकिएको थियो । अन्तर्राष्ट्रिय फुटबलमा नेपाली टिमविरुद्ध भुटानले पहिले अग्रता बनाएको र बराबरी खेलेको यो पहिलो पटक हो ।

प्रशिक्षक एनेसले नेपाली टिमले पछिल्लो खेलको तुलनामा निकै सुधार गरेका बताए ।

“हामीले यसअघि नै फाइनलमा स्थान बनाइसकेका थियौँ । यसैकारण हामी विश्वस्त थियौं । पहिलो हाफ खराब भयो । तर दोस्रो हाफमा हामीले डोमिनेट गर्‍यौँ । पोसेसन राख्यौं र तीन–चार महत्वपूर्ण मौका बनायौँ” प्रशिक्षक अल्बर्टो एनेसले भने, “मलाई लाग्छ हामीले राम्रो गर्‍यौँ । अर्को गोल भए पनि अफसाइट भयो । हामीले अञ्जन र डांगीबाट उत्कृष्ट मौकाको श्रृजना गरेका थियौं । अब हामी अर्को खेलमा केन्द्रित हुनेछौँ ।”

एनेसले नेपाली टिम युवा भएकाले आउदा दिनमा राम्रो हुनसक्ने प्रतिक्रिया दिए ।

“दीपक २३ वर्ष, मनिष २१ वर्ष, आयुष १९ वर्ष, अञ्जन २४ वर्षका छन् । हामीले आगामी दिनमा राम्रो गर्न सक्छौँ । जति गल्ती भयो, त्यसबाट सिक्ने हो । मलाई लाग्छ हामीले पछिल्लो खेलमा भन्दा आज राम्रो गर्‍यौँ,” प्रशिक्षक एनेस थप्छन् ।

“यो हप्ता हामीले तीन खेलाडी गुमायौं । उनीहरू राम्रो अवसरका लागि विदेशिए । यो निकै निराशजनक कुरा हो । नेपाली फुटबलको यो दुःखद कुरा हो, ।”

यस्तै, नेपाली टिमका कप्तान किरणकुमार लिम्बुले पहिलो हाफमा टिम केही कमजोर देखिएको स्वीकार गरे ।

“पहिलो हाफमा केही कमजोर भयो । मिस कम्युनिकेसन भयो । मिस्टेक्ली भुटानका अनमार्क रहेका खेलाडीबाट गोल खान पुग्यौ । दोस्रो हाफमा हामीले हाम्रो कमजोरीलाई सुधार्‍यौ । मौका पनि धेरै बनायौं,” कप्तान किरणले भने, “हामी फाइनलमा पुगिसकेका छौँ । आजको खेल हाम्रो लागि सक्कियो । अब फाइनलको तयारीमा लाग्नेछौं ।”

किरणले पहिलो हाफमा टिम धेरै आत्मविश्वासी बन्दा प्रदर्शन राम्रो हुन नसकेको बताए ।

“फुटबलमा कहिलेकाही नतिजा यस्तै आउँछ । पहिलो हाफमा धेरै आत्मविश्वासी भयौँ जस्तो लाग्छ । तर, गल्तीहरूबाट नै सिक्ने हौं । हामीले हाम्रो गल्ति चिनिसकेका छौं र आगामी दिनमा हामी यस्ता कुराहरुका लागि तयारी गर्नेछौं । फुटबल जति नै राम्रो खेले पनि अन्तिममा नतिजाको मुल्यांकन हुने हो । आज हारेको भए भुटानसँग हार्‍यो भन्ने आउँथ्यो । मेरो लागि नतिजाले महत्व राख्छ,” किरणले थपे ।