ममता मिश्रका दुई कविता

साहित्य

शनिबार, चैत ११, २०७९

शब्दहरू
यस्तै छ यहाँ,
शब्दहरूको होडबाजी चल्छ
कैले शब्दका जालहरू फ्याँकिन्छन्
कैले शब्दहरू नै जालमा जाकिन्छन्
कैले भावनाका छालमा बरालिन्छन् शब्दहरू
कैले शब्द शब्द आफैँमा जेलिन्छन् ।

शब्दमै जुट्छ मानिस, शब्दले नै टुट्छ
हरेक दिन शब्दसँगै लड्छ मानिस
अनि, शब्दले नै लडाउँछ
शब्दसँगको लडाइँमा
कैले हार्छ
अनि कैले जित्छ मानिस ।

शब्दले नै अहंकारी मानिस
शब्दले नै विषालु
शब्दमै छ सबै, शब्दले नै मायालु
शब्दैशब्दका तालहरूमा
शब्दसँगै नाच्छ मानिस
शब्दसँगको भागदौडमा
आफ्नो अस्तित्व खोज्छ मानिस
यस्तै छ यहाँ,
शब्द रोपी शब्दकै खेती गर्छ मानिस
शब्दमै आक्रोश
अनि, शब्दमै विनम्र मानिस
शब्दले नै दिन्छ पीडा
शब्दले नै पीडित मानिस
शब्दले नै रुवाउँछ, शब्दले नै हँसाउँछ
शब्दमै मन बहलाउँछ मानिस
शब्दले नै बहकाउँछ ।

कैले दुखाउँछन् शब्दहरू
वाण बनी रोपिन्छन् मुटुको भित्ताभित्तामा
कैले दुख्छन् आफैँभित्र शब्दहरू
छाँद बनी अड्किन्छन् हृदयको कुनाकुनामा
यस्तै छ यहाँ, शब्दमै मित्रता
अनि, शब्दमै युद्ध गर्छ मानिस ।

शब्दकै जाल फ्याँकेर
शब्दकै चाल चल्छ मानिस
शब्दले नै बलियो मानिस
शब्दले नै कमजोर पनि
शब्दको होडबाजीमा
कैले अघि, कैले पछि पर्छ मानिस
शब्दमै छ सबै शक्ति
शब्दले नै बेग्लै मानिस !