काठमाडौं । यो वर्ष ‘छक्का पञ्जा’ ले सर्वाधिक कलेक्शन गर्ने लगभग निश्चित प्रायः भएको छ । भदौ २४ गतेबाट प्रदर्शनमा आएको चलचित्रले अझै पनि राम्रो व्यापार गरिरहेको छ । 

यसअघि रिलिजमा आएका मिलन चाम्सको ‘वीर विक्रम’ र दिपेन्द्र के खनालको ‘चपली हाइट–२’ ले पनि राम्रै कलेक्शन गरेका थिए । यही २१ गते प्रदर्शनमा आउने छविराज प्रोडक्शनको ऋषि लामिछाने निर्देशित ‘किस्मत–२’ र राजु अधिकारीको ‘सुब्बा साब’ ले कस्तो व्यापार गर्छ या छक्का पञ्जाले नै यि दुई चलचित्रलाई पनि ओझेलमा पार्ने हो ? त्यो त हेर्न बाँकी नै छ । तर, यसपछि रिलिज हुने दर्शकको मन जित्ने सम्भावना बोकेका चलचित्र कुन–कुन हुन् ?    

रामबाबु गुरुङको ‘पुरानो डुङ्गा’, निश्चल बस्नेतको ‘लुट–२’, प्रदीप भट्टराईको ‘जात्रा’, देबकुमार श्रेष्ठको ‘लाल्टिन’, दिपेन्द्र लामाको ‘घामपानी’ र दिपेन्द्र के खनालको ‘लब लब लब’ सम्भावनाको नजरले हेरिएका चलचित्र हुन् । खनालको ‘लब लब लब’ भने वैशाख एक गते रिलिज डेट लिएको चलचित्र हो । 

रामबाबु गुरुङको ‘पुरानो डुङ्गा’ को ‘निर जहिले रिसाउने’ गीत हिट भइसकेको छ भने गुरुङले निर्माण गरेको डार्क कमेडी ‘कबड्डी’ र यसको सिक्वेल ‘कबड्डी कबड्डी’ लोकप्रिय चलचित्र हुन् । त्यसैले पनि उनले निर्माण गरेको ‘पुरानो डुङ्गा’ ले दर्शकको मन जित्ने अपेक्षा गरिएको छ । यसमा गुरुङले रिस्मा गुरुङ र दयाहाङ राईको जोडी छुटाइदिएका छन् । दयाहाङले यो चलचित्रमा अहिलेकी स्टारडम नायिका प्रियंका कार्कीसँग स्क्रिन रोमान्स गर्दैछन् । ‘पुरानो डुङ्गा’ ले मंसिर १० गतेको रिलिज डेट लिएको छ । 

निश्चल बस्नेतको ‘लुट–२’, पनि बहुप्रतिक्षित सिनेमा हो । ‘लुट’ निर्माण गरेर नेपाली सिने उद्योगमा नयाँ ट्रेन्ड नै खडा गरेका निश्चलको नयाँ चलचित्र ‘लुट–२’ ले पनि दर्शकलाई हलसम्म तान्ने निश्चित छ । उनले आफूले अघिल्लो सिनेमामा देखिएका गल्तिसमेत नदोहोर्याएको बताएका छन् । दयाहाङ र सौगात मल्ल यो चलचित्रका आकर्षण हुन् । पुरानै युनिटलाई लिएर बनेको ‘लुट–२’ ले फागुन १३ गतेका लागि प्रदर्शनको मिति लिएको छ । 

प्रदीप भट्टराईको ‘जात्रा’ पनि आशाको नजरले हेरिएको अर्को चलचित्र हो । विपिन कार्की, रविन्द्रसिंह बानिया, वर्षा राउत लगायतका चलचित्रकर्मीले अभिनय गरेको चलचित्र न्युरोडका व्यापारिबीचको द्वन्द्वको कथा समेटिएको चलचित्र हो । ‘जात्रा’ लाई निर्देशक भट्टराईले विपिन कार्की चलचित्र ‘पशुपतिप्रसाद’ का भस्मे र रविन्द्रसिंह बानिया ‘पशुपतिप्रसाद’ कै हनुमान जी को काँधमा राखिदिएका छन् । ‘जात्रा’ले कात्तिक १९ गतेको रिलिज डेट लिएको छ । 

देबकुमार श्रेष्ठको ‘लाल्टिन’, पनि यो वर्ष अपेक्षा गरिएको अर्को चलचित्र हो । दयाहाङ राई र प्रियंका कार्कीको स्क्रिन जोडी रहेको चलचित्रमा आस्था राउतको बजार तताउने फरक शैलीको गीत छ । ‘लाल्टिन’  चैत १८ गते प्रदर्शन हुँदैछ । 

दिपेन्द्र लामाको ‘घामपानी’ ले पनि दर्शकको ध्यान आफूतर्फ खिच्ने पूर्वानुमान गरिएको छ । यो चलचित्रमा दयाहाङ राई र केकी अधिकारी स्क्रिन जोडी देखिनेछ । 

दिपेन्द्र के खनालको ‘लब लब लब’ पनि सम्भावना बोकेको अर्को चलचित्र हो । नेपाली कथानक चलचित्र ‘लभ लभ लभ’ ले विसं २०७४ को पहिलो दिन वैशाख १ गतेलाई रिलिज डेट लिएको चलचित्र हो । ‘पशुपतिप्रसाद’ का निर्देशक दिपेन्द्र के खानल निर्देशित चलचित्र ‘लभ लभ लभ’ मा स्वस्तिमा खड्का, सुरज पाण्डे लगायतका कलाकारले अभिनय गरेका छन् ।