काठमाडौं । अखिल नेपाल फुटबल संघ (एन्फा)ले यही असोज १३ गतेबाट गर्न लागेको सहिद स्मारक ‘ए’ डिभिजन लिगमा भाग लिने क्लबमध्ये ६ वटाले अझै प्रायोजक पाएका छैनन् । पाँच वर्षपछि हुन लागेको लिगलाई एन्फाको वर्तमान कार्यसमितिले ‘वार्मअप लिग’ भनेको छ । ६ दशकको इतिहास बोकेको सहिद स्मारक लिगमा पहिलो पटक क्लबले घटुवा हुनुपर्ने छैन । रेलिगेसनमा नपर्ने भएकाले सहभागी क्लबहरुको तयारी पनि त्यति प्रभावकारी देखिएको छैन । 

एन्फाबाट पाउने २० लाख रुपैयाँमध्ये पहिलो किस्ताको ५ लाखबाट क्लबहरुले तयारी गरिरहेका छन् । काठमाडौंका ६ वटा क्लबहरुलाई काठमाडौं महानगरपालिकाले पनि ९ लाख ३० हजार रुपैयाँका दरले सहयोग उपलब्ध गराएको छ । 

महिनौं चल्ने लिगमा क्लबहरुलाई खेलाडी राख्न सजिलो छैन राम्रो आर्थिक स्रोत नहुने हो भने । अहिलेको लिगमा सहभागी १४ मध्ये ६ क्लब अझै प्रायोजकविहीन छन् । केही ठूला क्लबहरुले खेलाडी अनुबन्धन गरेर तयारी गरे पनि फुटबलका गतिविधिमा सधैं सक्रिय नहुने क्लब भने आर्थिक समस्यामा छन् । 

प्रायोजक पाएका क्लब

मनाङ मस्र्याङ्दी
सबैभन्दा बढी ७ पटक सहिद स्मारक ए डिभिजन लिगको उपाधि जितेको मनाङ मस्र्याङ्दी क्लबलाई सिग्नेचर ह्विस्कीले प्रायोजन गरेको छ । यसअघि लक्ष्मी हुन्डाईको साथ पाएको थियो मनाङले । लिगमा मनाङ सिग्नेचरको लोगोसहितको जर्सीमा मैदान उत्रनेछ । यसअघि लक्ष्मी हुन्डाईसँग लिग भए २० लाख तथा नभए १० लाख रुपैयाँको सम्झौता गरेको मनाङले सिग्नेचरसँग केही दिनमा त्योभन्दा बढी रकममा सम्झौता गर्ने मनाङका अध्यक्ष मुखिया कान्छा गुरुङले जनाए । 

थ्री स्टार
चार पटकको लिग विजेता थ्री स्टार क्लबले रुस्लान भोड्काको साथ पाएको छ । थ्री स्टारलाई रुस्लानले पहिल्यैदेखि प्रायोजन गर्दै आएको थियो । रुस्लानले यस लिगमा पनि निरन्तरता दिएको हो । थ्री स्टारले सातोदोबाटोस्थित चर्च ग्राउन्डमा प्रशिक्षण गरिरहेको छ ।

त्रिभुवन आर्मी 
विभागीय क्लब त्रिभुवन आर्मीलाई पल्सरले प्रायोजन गरेको छ । यसअघिको सम्झौताअनुसार पल्सरले आर्मीलाई निरन्तरता दिएको हो । पल्सर अहिले लिगको पनि मुख्य प्रायोजक हो । राष्ट्रिय टोलीका भरपर्दा खेलाडी भरत खवास, नवयुग श्रेष्ठ र सुमन अर्यालजस्ता खेलाडी सम्मिलित आर्मीले २०१४ सालमा चौथो संस्करणको लिग जितेको थियो ।

एपिएफ
विभागीय क्लब एपिएफलाई अग्नि इन्कर्पोरेट प्रालिले प्रायोजन गरेको छ । लिगका लागि अग्नि इन्कर्पोरेटको महिन्द्राले एपिएफसँगको सम्झौता नवीकरण गरेको हो । प्रत्येक वर्ष ४० लाख दिनेगरी ५ वर्षका लागि अग्नि इन्कर्पोरेट र एपिएफबीच सम्झौता नवीकरण भएको हो । राजेन्द्र तामाङलाई प्रशिक्षणको जिम्मेवारी दिएर एपिएफले नियमितबाहेक लिगलाई प्राथमिकतामा राखेर अभ्यास गरिरहेको छ ।

संकटा 
यसअघिकै प्रायोजक सिएमजी गुप्रले संकटासँग लिगका लागि पनि सम्झौता नवीकरण गरेको छ । एन्फाका महासचिवसमेत रहेका इन्द्रमान तुलाधारको क्लब संकटाले उपाधि जित्ने लक्ष्य राखेको छ । संकटाले यसअघि २०४०, ०४२ र ०३७ गरी तीनपटक लिगको उपाधि जितिसकेको छ । 

फ्रेन्ड्स
फ्रेन्ड्स क्लबलाई नेपाल इन्भेष्टमेन्ट बैंकले प्रायोजन गरेको छ । सम्झौताअनुसार बैंकले क्लबलाई लिग अवधिभरका लागि १० लाख उपलब्ध गराउने छ । क्लबले बैंकको लोगो अङ्कित जर्सी लगाउनेछ । 

क्लबको सह–प्रायोजकको रुपमा पञ्चकन्या ग्रुप रहेको छ । सहमतिअनुसार पञ्चकन्याले सहप्रायोजकबापत क्लबलाई पाँच लाख उपलब्ध गराउने क्लबका अध्यक्ष राजीव पौडेलले जानकारी दिए । दुबै सम्भौता ‘ए’ डिभिजन लिगको अवधिभरका लागि कायम हुनेछ । यसअघि समेत बैंकले क्लबलाई मुख्य प्रायोजकको रुपमा सहकार्य गर्दै आएको थियो । करीब चार चार वर्ष लिग रोकिएपछि दुबैको सहमतिमा सम्झौता स्थगित गरिएको थियो । 

च्यासल युवा क्लब
च्यासल युवा क्लबलाई माइभ्याली कन्स्ट्रक्सनले मुख्य प्रायोजन गरेको छ । यस्तै सम्झना ल्याब्रोटरीले सहप्रायोजन गरेको छ । 

जावलाखेल युवा क्लब
जावलाखेललाई जावलाखेल गुप्र अफ इन्डस्ट्रीजले प्रायोजन गरेको छ । 

प्रायोजन नपाएका क्लब

सरस्वती युवा क्लब 
सरस्वती युवा क्लब प्रायोजकको खोजीमा छ । एमटिभीसँग सहप्रायोजन गरेको सरस्वतीले लिगका लागि प्रायोजक खोजिरहेको जानकारी दिएको छ । 

मच्छिन्द्रा क्लब
फुटबलका गतिविधिमा खासै सहभागी नहुने मच्छिन्द्राले हालसम्म प्रायोजन पाएको छैन । केही व्यावसायिक घरानासँग कुरा भइरहेको र केही दिनमै सम्झौता हुने क्लबका अध्यक्ष प्रबोध कंसाकारले बताए । 

ब्रिगेड ब्वाइज क्लब 
मोफसलका प्रतियोगितामा खासै चासो नराख्ने ब्रिगेड ब्वाइजले पनि प्रायोजक पाएको छैन । क्लबले लिगको तयारीका लागि एन्फाले दिएको २० लाख रुपैयाँले तयारी गरिरहेको छ । 

हिमालय शेर्पा क्लब
एन्फाका अध्यक्षसमेत कर्माछिरिङ शेर्पाको हिमालय शेर्पा क्लबले पनि प्रायोजक पाएको छैन । प्रायोजक खोजिरहेको र केही दिनमा कुनै एक कम्पनीसँग सम्झौता हुने क्लबका एक प्रतिनिधीले बताए ।  

न्युरोड टिम (एनआरटी) 
काठमाडौंको एनआरटी प्रायोजक खोज्ने मनसायमा छैन । महानगरको सहयोग र एन्फाले तयारीका लागि दिएको रकमबाट क्लबले तयारी गरिरहेको छ । आर्थिक समस्या खासै नरहेकाले प्रायोजकको खोजीमा नभौतारिएको एनआरटीको भनाइ छ । चार पटक उपाधि जित्दै एनआरटीले लिगमा राम्रो प्रभाव छाडिसकेको छ । 

नेपाल पुलिस क्लब
लिगमा एकछत्र राज गरेको विभागीय क्लब पुलिस पनि प्रायोजकविहीन छ । नेपाल टेलिकमसँगको सम्झौता सकिएपछि पुलिस क्लबले नवीकरणका लागि प्रक्रिया अघि बढाएको भए पनि सम्झैता हुन सकेको छैन ।