काठमाडौं । विश्व फुटबल महासंघ (फिफा)ले रुस विश्वकपबारे समीक्षा गर्न आयोजना गरेको अन्तरक्रिया कार्यक्रम ‘फिफा फुटबल कन्फ्रेन्स’मा नेपालबाट ३ जना सहभागी भएका छन् । प्राविधिक विषयमा छलफल गर्न फिफाले पहिलो पटक यस्तो कार्यक्रम आयोजना गरेको हो । प्राविधिक विषयको छलफलमा फिफामा आबद्ध २ सय देशका मुख्य प्रशिक्षक र टेक्निकल डाइरेक्टर सहभागी भएका छन् । 

नेपालबाट भने एन्फा अध्यक्ष कर्माछिरिङ शेर्पा दुई उपाध्यक्ष उपेन्द्रमान सिंह र कृष्ण थापासहित लण्डन पुगेका छन् । मुख्य प्रशिक्षक र टेक्निकल डाइरेक्टरलाई पठाउनुपर्नेमा एन्फा अध्यक्ष शेर्पा आफैं टोलीको नेतृत्व गर्दै लण्डन पुगेका हुन् । हाल बालगोपाल महर्जन नेपाली राष्ट्रिय टोलीमा कार्यवाहक मुख्य प्रशिक्षकको जिम्मेवारीमा छन् । उनको प्रशिक्षणमा नेपालले हालै बंगलादेशमा सम्पन्न साफ च्याम्पियनसिपमा सेमिफाइनलसम्मको यात्रा तय गरेको थियो । मुख्य प्रशिक्षकको स्थानमा एन्फाले बालगोपाल महर्जनलाई पठाउनु पर्ने थियो ।

“अध्यक्षसहितको यो भ्रमण गलत हो । टेक्निकल विषय त्यसैसँग जोडिएको व्यक्तिले बुझ्छ, त्यसैले टेक्निकल व्यक्तिलाई पठाउनु पर्ने हो । मुख्य प्रशिक्षक नभए पनि अन्तरिम मुख्य प्रशिक्षकका रुपमा बालगोपाल महर्जनले काम गरिरहेका छन् । टेक्निकल डाइरेक्टरमा जापानी ताकेता छन् । एन्फाले उनलाई पनि उक्त कार्यक्रममा सहभागी गराएन,” एन्फाका एक उच्च पदाधिकारीले असन्तुष्टि पोेखे । 

एन्फाका प्रवक्ता किरण राईले भने अध्यक्ष र उपाध्यक्षको विदेश भ्रमणको बचाउ गरेका छन् उनले भने, “फिफाले टेक्निकल व्यक्तिलाई मात्र तोकेर बोलाएको होइन । अर्वार्डसँगै अन्तरक्रिया कार्यक्रमका लागि निमन्त्रणा पठाउँदा उहाँहरु जानुभएको हो । टेक्निकल कमिटीमा रहेका दुई उपाध्यक्ष पनि जानुभएको छ । अन्यलाई उपेक्षा गरेर पठाइएको होइन ।”

प्रवक्ताले नेतृत्वको बचाउ प्रयास गरे पनि यो विषयलाई लिएर एन्फाभित्र अहिले एक पक्ष असन्तुष्ट बनेको छ । “पहिला हामीले चुनावअघिसम्म ‘राइट म्यान राइट प्लेस’ को कुरालाई प्राथमिकताका साथ उठाएका थियौं । तर अहिले स्वयं अध्यक्ष र उपाध्यक्षहरुले यस्तो गरेपछि फुटबल परिवारमा मुख देखाउन पनि गाह्रो भएको छ,” एन्फाका जिम्मेवार एक पदाधिकारीले बाह्रखरीसँग भने ।

फिफाले २१ आैं संस्करणको विश्वकपमा भएका प्राविधिक विषयमा छलफल गर्न २ सय देशका मुख्य प्रशिक्षक र टेक्निकल डाइरेक्टरलाई बोलाएको हो । प्राविधिक विषयबारे छलफल गर्न आयोजित कार्यक्रमको फिफा अध्यक्ष जियानी इन्फान्टिनोले उद्घाटन गरेका छन् । कार्यक्रममा रुस विश्वकपबारे फिफाको टेक्निकल अध्ययन गुप्रले प्रमुख तथ्यांकसहित टेक्नोलोजी र सामूहिक मूल्यांकन पेश गर्ने कार्यक्रम छ । 

साथै विश्वकप विजेता फ्रान्सका मुख्य प्रशिक्षक डिडियर डेसच्याम्पसले आफ्नो विश्वकप अनुभव सुनाउने छन् । कार्यक्रममा प्रशिक्षण पद्धति, रूस विश्वकपबाट सिक्ने पाठहरू र भिडियो सहायक रेफ्रीको प्रयोगबारे छलफल हुने बताइएको छ ।