काठमाडौं ।  २०५८ सालमा बुबा बाबुकाजी महर्जनको हात समातेर एन्फा प्रवेश गर्दा विराज महर्जनलाई लागेको थियो– म ठूलो फुटबलर बन्छु । अन्डर १० का लागि एन्फा एकडेमीमा प्रवेश गर्दैगर्दा विराजको मनमा उब्जिएको फुटबलर बन्ने सपना त पूरा भयो नै । उनले कीर्तिमान पनि कायम गरेका छन् । एन्फा पुग्दा ८ वर्षका विराज महर्जन अहिले २९ वर्षका भए । तर, एन्फा प्रवेश गर्दा मनमा उब्जिएको जोस शारीरिक रुपमा केही कम भए पनि उस्तै लाग्छ विराजलाई । ठूल्दाइ विक्रम महर्जनको खेलबाट हौसिएका विराज महर्जनको परिवार फुटबलमा नै घुलित छ । 

उनका दाजु विक्रम एन्फा एकेडेमीका पहिलो ब्याचका कप्तान हुन् भने बुबा बाबुकाजी क्लब स्तरका खेलाडी । काका रत्नजीत महर्जनले उमेर समूहको खेलबाट नेपालको प्रतिनिधित्व गरिसकेका छन् । विराजलाई पनि फुटबल भन्दा बाहिर जान मन लागेन र बुबाको आग्रहमा एन्फा एकेडेमी भर्ना भए । विभिन्न उमेर समूह हुँदै सन् २००८ मा पोखरामा पाकिस्तानविरुद्ध भएको मैत्रीपूर्ण खेलबाट डेब्यु गरेका विराजले नेपाली फुटबलमा इतिहास बनाएका छन् । 

नेपाली फुटबलका प्रशिक्षक राजुकाजी शाक्यको ६८ क्यापको रेकर्डमा विराजले आफ्नो नाम थपेका छन् । आफ्ना गुरुको ६८ क्यापको रेकर्ड उनले बंगलादेशमा जारी साफ च्याम्पियनसिपमा भुटानविरुद्ध खेल्दै ६९ क्यापको नयाँ कीर्तिमान बनाएका हुन् । यसअघि नेपाली खेलाडीले सर्वाधिक ६८ क्याप खेलेको कीर्तिमान राजुकाजी शाक्यको नाममा थियो ।

सफल कप्तान
म्याच फिक्सिङ काण्डपछि रुमलिएको नेपाली फुटबल टोली २०७२ माघमा बंगबन्धु गोल्डकप खेल्न बंगलादेश गयो । बंगबन्धु रंगशालामा फाइनलमा बहराइनलाई हराउँदै नेपालले २३ वर्षपछि उपाधी जित्यो । विराज महर्जनकै कप्तानीमा रहेको नेपाली टोलीले उपाधी खडेरीलाई तोडेको थियो । बंगबन्धु गोल्डकपपछि हौसिएको नेपाली टोलीले २०७२ फागुनमा भारतमा सम्पन्न १२ सागमा स्वर्ण पदक जित्यो । 

१७ वर्षपछि फाइनलमा पुगी आयोजक भारतलाई पराजित गर्दै स्वर्ण पदक जित्दा नेपालको कप्तानी विराज महर्जनले नै गरेका थिए । २०७३ कात्तिकमा सोलिडारिटी कपमा नेपाल च्याम्पीयन बन्यो । मलेसियाको कुचिङमा मकाउलाई हराउँदै २३ वर्षपछि पहिलो अन्तर्राष्ट्रिय उपाधि जित्दा नेपाली कप्तानी विराजले नै सम्हालेका थिए । एकपछि अर्को उपाधी आफ्नै कप्तानीमा जितेर विराजले सफल कप्तानको उपमा पाएका छन् । 

सन्यासको योजना
साथीभाइका बीच प्रिय विराज महर्जन कीर्तिमान बनेकोमा निकै खुसी छन् । भन्छन्, “मेहनत र सबैको मायाले नयाँ कीर्तिमान बनाउन सफल भएको छु । देशका लागि ६९ क्याप खेल्न पाउनु गर्वको विषय हो ।” अब करिब २ वर्ष खेलेर सन्यास लिने योजनामा उनी छन् । उनी भन्छन्, “नयाँ भाइहरु आइरहेका छन् । आफूभन्दा राम्रो गर्ने क्षमता देख्नेबित्तिकै स्थान दिनेछु ।”
प्रशिक्षक राजुकाजी शाक्य पनि विराज महर्जनले नयाँ कीर्तिमान बनाएकोमा निकै खुसी छन् । “आफूले सिकाएको चेलाले आफ्नै कीर्तिमान ब्रेक गर्दा खुसी लाग्ने रैछ,” प्रशिक्षक शाक्यले भने, “अनुशासित, मेहनती र लगनशिल खेलाडीको परिचय बनाएका महर्जनप्रति मेरो विश्वास उस्तै छ । आगामी दिनमा अझै राम्रो प्रदर्शन गर्नेछ ।”