काठमाडौं । प्रतिनिधिसभामा सांसदको आसन ‘रित्तो’ जस्तै देखिन्छ । सरकारको नीति तथा कार्यक्रममाथिको छलफल शुक्रबार पनि जारी छ । जहाँ सांसदहरूको संख्या एकदमै न्यून छ । आफ्ना कुरा राख्ने र अरुको कुरा नसुन्ने प्रवृत्ति सांसदहरूमा देखिएको छ । 

प्रतिपक्ष मात्रै होइन, सत्तापक्षका सांसदको संख्या पनि एकदमै कम छ । छलफलका क्रममा सांसद संख्या गणना नहुने भएकाले गणपूरक संख्या नपुगेर बैठक नै स्थगित हुने अवस्था भने हुँदैन । अरु बेलामा पनि सदनमा सांसदहरूको उपस्थितिलाई लिएर प्रश्न उठ्दै आएको छ । तथापि, सांसदहरूको शैली भने फेरिएको छैन । शीर्ष नेताहरूको सिट सधैँजसो खाली हुने गरेको छ ।

सरकारको आगामी वर्षको नीति तथा कार्यक्रम यही वैशाख १९ गते राष्ट्रपति रामचन्द्र पौडेलले सदनको संयुक्त बैठकमा प्रस्तुत गरेका थिए । सोही कार्यक्रममाथि छलफल भइरहेको हो । नीति तथा कार्यक्रम आइतबार (वैशाख २८ गते) निर्णयार्थ पेस गर्ने तयारी छ । सत्तापक्षले सोही दिनको बैठकमा अनिवार्य उपस्थित भएर पक्षमा मतदान गर्न ह्वीप जारी गरिसकेको छ ।