काठमाडौं । बुटबल पावर कम्पनी लिमिटेड (बीपीसी)ले न्यादी हाइड्रोपावर लिमिटेडको सेयर बिक्री गर्ने भएको छ । बीपीसीले नयाँ आयोजनामा लगानी जुटाउन ३१ लाख कित्ता सेयर दोस्रो बजारमा बिक्री गर्न लागेको हो । 

बीपीसीले सेयरको न्यूनतम मूल्य खुलाएको छैन । न्यादीमा बीपीसीको एक करोड सात लाख ५१ हजार ४५३ कित्ता सेयर रहेको छ । 

कम्पनीले ३० मेगावाटको न्यादी जलविद्युत् आयोजना सञ्चालन गरिरहेको छ । न्यादी बीपीसीको सहायक कम्पनी हो । 

न्यादीमा एक करोड नौ लाख ५० हजार कित्ता संस्थापक सेयर रहेको छ । यस्तै ४० लाख ५० हजार कित्ता सर्वसाधारणको रहेको छ । 

एक करोड ५० लाख कित्ता सेयर नेपाल स्टक एक्सचेन्ज (नेप्से) मा सूचिकृत रहेको न्यादीले जनाएको छ । 

बीपीसीले तीन चिनियाँ कम्पनीको साझेदारीमा मस्र्याङ्दी बेसिनमा ६०१ मेगावाटका तीन ठूला अर्धजलाशय आयोजना बनाउन थालेको छ । 

• तीन ठूला आयोजना बनाउन एक अर्ब ३६ करोडको हकप्रद सेयर निष्कासन गर्दै बीपीसी

अर्धजलाशय आयोजना बनाउन एक अर्ब २० करोड अमेरिकी डलर (करिब एक खर्ब ६२ अर्ब रुपैयाँ) लगानी हुने भएको छ । बीपीसीले चिनियाँ कम्पनीमार्फत बनाउन लागेको आयोजनामा ३२७ मेगावाटको माथिल्लो मस्र्याङ्दी–२, १३९ मेगावाटको तल्लो मनाङमस्र्याङ्दी १३५ मेगावाटको मनाङ मस्र्याङ्दी जलविद्युत् आयोजना हुन् ।
 
न्यादीको सेयर प्रतिकित्ता ५०५ रुपैयाँमा कारोबार भएको छ । न्यादीको बजार पुँजीकरण सात अर्ब ६१ करोड ५० लाख रुपैयाँ पुगेको नेप्सेले जनाएको छ । कम्पनीको चुक्ता पुँजी डेढ अर्ब रुपैयाँ छ ।
 
नयाँ आयोजना बनाउँन थप सार्वजनिक निष्कासन (एफपीओ)को प्रक्रिया रद्द गरेर चुक्ता पुँजीको ४० प्रतिशत हकप्रद सेयर निष्कासन गर्न लागेको छ ।

बीपीसीको चुक्तापुँजी तीन अर्ब ४० करोड ९० लाख रुपैयाँ छ । अब कम्पनीले हकप्रद सेयर जारी गरेर एक अर्ब ३६ करोड ३६ लाख रुपैयाँ उठाउने भएको छ । 

हकप्रदबाट संकलन हुने रकम कम्पनीले निर्माण गरिरहेको जलविद्युत् आयोजनामा लगानी हुने भएको छ । हकप्रद सेयर निष्कासनपछि कम्पनीको चुक्तापुँजी बढेर चार अर्ब ७७ करोड रुपैयाँ पुग्नेछ ।

यसमध्ये १३५ मेगावाटको मनाङ–मस्र्याङ्दी क्यास्केड जलविद्युत् आयोजनालाई लगानी जुटेको छ । चीनको निर्यात–आयात (एक्जिम) बैंकले ऋण आयोजनामा लगानी सम्झौता गरेको छ ।

जलविद्युत्मा लगानी गर्न बीपीसी र तीनवटा चिनियाँ कम्पनीले एससीआईजी इन्टरनेसनल नेपाल हाइड्रो ज्वाइन्ट डेभलपमेन्ट कम्पनी प्रालि स्थापना गरेका छन् । तीन आयोजना बनाउँन एससीआईजी इन्टरनेसनल नेपाल हाइड्रो ज्वाइन्ट डेभलपमेन्ट इन्भेस्टमेन्ट कम्पनी प्रालि स्थापना भएको छ । 

एससीआईजीमा बीपीसीको अतिरिक्त जिचेङ इन्टरनेसनल इन्भेस्टमेन्ट कम्पनी लिमिटेड, क्यूआईईसी इन्टरनेसनल कम्पनी लिमिटेड र एससीआईजी इन्टरनेसनल लिमिटेडको लगानी रहनेछ ।

एससीआईजीमा बीपीसीको २० प्रतिशत र बाँकी चिनियाँको छ । जसअनुसार सिचुवान इन्भेस्टमेन्ट ग्रुप कम्पनी लिमिटेडको ५१, चेन्दु सिच्याङ इन्भेस्टमेन्ट ग्रुप कम्पनी लिमिटेडको १७ र क्विङयाङ इन्जिनियरिङ कन्सल्टिङ कम्पनी लिमिटेडको १२ प्रतिशत स्वामित्व हुने गरी लगानी संरचना तयार पारिएको छ । एक अर्ब ९० करोड रुपैयाँ पुँजी रहने होल्डिङ कम्पनीमा स्वपुँजी (इक्विटी) लगानी छ ।

माथिल्लो मस्र्याङ्दी–२ र तल्लो मनाङ मस्र्याङ्दी आयोजनाको सरकार र एससीआईजीबीच आयोजना विकास सम्झौता (पीडीए) को तयारीमा छ । 

नेपाल विद्युत् प्राधिकरणसँग बिजुली खरिदबिक्री सम्झौता (पीपीए) र ऊर्जा मन्त्रालयसँग आयोजना विकास सम्झौता (पीडीए) भएपछि आयोजना बनाउन लगानी जुट्नेछ । १३५ मेगावाटको आयोजनामा चाइना एक्जिम बैंकको ऋण लगानी हुनेछ ।
 
अहिले बीपीसीले १७४ मेगावाट क्षमताको मुगु कर्णाली जलविद्युत्  आयोजनाको सम्भाव्यताको अध्ययन सकिएको बीपीसीले जनाएको छ ।

बीपीसीले नेपालमा एकहजार मेगावाट बिजुली उत्पादन गर्न दुई खर्ब रुपैयाँ बढी वैदेशिक लगानी ल्याउन सन् २०१८ मा लगानी चिनियाँ कम्पनीहरूसँग सम्झौता गरेको हो ।