काठमाडौं । आईसीसी यू–१९ पुरुष क्रिकेट विश्वकप एसिया छनोटमा नेपालले लगातार तेस्रो जित निकालेको छ । नेपालले बुधबार हङकङविरुद्ध नौ विकेटको सहज जित निकालेको हो ।

बुधबार मुलपानीस्थित तल्लो मुलपानी क्रिकेट मैदानमा सम्पन्न खेलमा हङकङले प्रस्तुत गरेको ११६ रनको लक्ष्य नेपालले १२.३ ओभरमा एक विकेट गुमाएर पूरा गरेको हो ।  

नेपालको जितमा साहिल पटेलले अविजित ४२ रन बनाए । उनले ४१ बलमा आठ चौका प्रहार गरे । कप्तान नरेन भट्टले २३ बलमा आठ चौकासहित ३९ रन बनाए । निरज कुमार यादवले १२ बलमा चार चौकासहित २३ रन थपे । 

हङकङका सयान पुरीले एक विकेट लिए । 

त्यसअघि, टस हारेर ब्याटिङमा आएको हङकङले ४६.२ ओभरमा १० विकेट गुमाएर ११५ रनको योगफल खडा गरेको थियो । 

हङकङका शिव माथुरले ११६ बलमा ६३ रन बनाए । आर्या पञ्जवानीले १३ र वीर माथुरले १२ रन जोडे । 

हङकङलाई सस्तैमा समेट्न युवराज खत्रीले चार विकेट लिए । १० ओभर बलिङ गरेका उनले १८ रनमात्र खर्चिए । विपीनप्रसाद शर्माले तीन विकेट लिँदा सन्तोष यादवले दुई विकेट लिए ।
 
यसअघि नेपालले पहिलो खेलमा युनाइटेड अरब इमिरेट्स (यूएई)विरुद्ध डकवर्थ लेविस पद्दतिअनुसार पाँच रनले र दोस्रो खेलमा ओमानविरुद्ध आठ विकेटको जित निकालेको थियो ।

नेपालले शनिबार अन्तिम खेलमा अफगानिस्तानविरुद्ध प्रतिस्पर्धा गर्नेछ ।