
काठमाडौं । आठौँ संस्करणको 'एनसेल बाह्रखरी गल्फ'को उपाधि दोर्जे होजाङस्टाङले जितेका छन् । शनिबार काठमाडौंस्थित गोकर्ण फरेस्ट रिसोर्टमा सम्पन्न प्रतियोगिताबाट होजाङस्टाङ विजेता बनेका हुन् । बाह्रखरी मिडियाले वार्षिकरूपमा आयोजना गर्दै आएको प्रतियोगिताको विजेता बनेका दोर्जेले सुनको बल पुरस्कार जिते ।
अठार होलको ‘स्टेबल फोर्ड’ पद्धतिमा खेलाइएको प्रतियोगिताका विजेता दोर्जेले ४४ अंक जोडेका थिए । उनले फ्रन्ट नाइटमा २५ अंक जोडेका थिए भने ब्याक नाइनमा १९ अंक जोडेको थिए ।
आठौँ संस्करणले नयाँ विजेता पाउँदा प्रतियोगिताको चार संस्करण गोकर्ण फरेस्ट रिसोर्टमा आयोजना भएका छन् । यस्तै, दुई संस्करण पोखरामा हुँदा सगरमाथा क्षेत्र र धरानमा समान एक संस्करण आयोजना भएका थिए
बाह्रखरी गल्फ पहिलोपटक विसं २०७४ सालमा भएको थियो ।
यी हुन् आठ संस्करण आइपुग्दासम्मका विजेता
यस कर्पोरेट गल्फको पहिलो संस्करणको विजेता हुन्, क्याप्टेन नोर्बु शेर्पा । गोकर्णमै भएको प्रतियोगितामा नोर्बुले चार हेन्डीक्याप ४२ स्टेबलफोर्ड अंकसहित उपाधि जितेका थिए । महिलातर्फको उपाधि रेखा घिमिरेले जितेकी थिइन् । उनले कुल ३४ अंक जोड्दै उपाधि चुमेकी थिइन् ।
गोकर्णमै भएको दोस्रो संस्करणको विजेता बने, आत्माराम सिंम्खडा । उनले उपाधि जित्ने क्रममा भारत बस्ताकोटीलाई पछि पारेका थिए । दोस्रो संस्करणमा महिलातर्फको च्याम्पियन प्रतिमा शेर्पा बनेकी थिइन् ।
प्रतियोगिताको तेस्रो संस्करण समुन्द्र सतहबाट चारहजार २५० मिटर उचाइँमा भएको थियो । बाह्रखरी गल्फले तत्कालीन समयमा विश्वकै उच्च स्थानमा गल्फ प्रतियोगिता आयोजना गरेर विश्व कीर्तिमान बनाएको थियो । सगरमाथा क्षेत्रमा अवस्थित कोङ्दी हिमालको ‘कोङ्दे री’मा भएको प्रतियोगितालाई विश्वभरका मिडियाले ठूलो महत्त्वका साथ समाचार बनाएका थिए ।
यस संस्करणको उपाधि टासी छिरिङले जितेका थिए । महिलातर्फको उपाधि कश्मिरा शाहले जितेकी थिइन् ।
प्रतियोगिताको चौथो संस्करण कास्कीको पर्यटकीय नगरी पोखरास्थित हिमालयन गल्फ कोर्समा आयोजना भएको थियो । जहाँ पूर्वसचिव अर्जुनकुमार कार्कीले पुरुषतर्फको उपाधि जितेका थिए । प्रतियोगितामा उनले ३५ स्कोर गर्दै उपाधि हात पारेका थिए । महिलातर्फको उपाधि रेखा घिमिरेले २३ अंकसहित जितेकी थिइन् । उनले च्याम्पियन बन्दा पोर्चुगलकी सोफी ह्यामनलाई पछि पारेकी थिइन् ।
बाह्रखरी मिडियाले प्रतियोगिताको पाँचौँ संस्करण सुनसरीको धरानमा आयोजना भएको थियो । यस संस्करणको उपाधि संस्करण राजकुमार राई ४१ स्टेबलफोर्ड स्कोरसहित जितेका थिए । सोही संस्करणमा कोसी प्रदेशको समृद्धिका निम्ति आर्थिक सम्मेलन र योङ आन्छरप्रिनुअर्स सम्मेलन पनि आयोजना भएको थियो ।
उक्त संस्करणको महिलातर्फको उपाधि सुस्मा सिंह साह ३९ अंकसहित जितेकी थिइन् ।
पछिल्लो तीन संस्करण मोफसलमा आयोजना भएपछि प्रतियोगिताको छैटौँ संस्करण पुनः काठमाडौंस्थित गोकर्ण फरेस्ट रिसोर्टमा आयोजना भएको थियो । उक्त संस्करणमा बाह्रखरीले एनसेल बाह्रखरी गल्फसँगै आर्थिक परिसंवाद आयोजना गरेको थियो । छैटौँ संस्करणको उपाधि सञ्जय पौडेलले जितेका थिए ।
अठार होलमा ‘स्टेबलफोर्ड’ पद्धतिमा खेलाइएको प्रतियोगिताका विजेता सञ्जयले ४० अंक जोडेका थिए । यस संस्करणको उपाधि महिलातर्फको उपाधि तारा कार्की चित्रकारले जितिन् । उनले ३६ अंक जोडेकी थिइन् ।
प्रतियोगिताको सातौँ संस्करण पुनः पोखरास्थित हिमालयन गल्फ कोर्समा पुग्दा १८ होलको ‘स्टेबल फोर्ड’ पद्धतिमा खेलाइएको प्रतियोगिताका विजेता अर्जुनकुमार कार्कीले ३९ अंक जोडेका थिए । आठ ह्यान्डीक्यापमा खेलेका कार्कीले फ्रन्ट नाइनमा २२ अंक जोडेका थिए भने ब्याक नाइनमा १७ अंक जोडेका थिए ।
यस संस्करणमा महिलातर्फको उपाधि सुस्मा सिंहले जितिन् । उनले ३६ अंक जोडेकी थिइन् । उपविजेता बनेकी बालकासी गुरुङले ३० अंक जोडेकी थिइन् ।