काठमाडौं । काठमाडौं महानगरपालिकाका प्रमुख प्रशासकीय अधिकृत चढ्ने गाडीको ‘ह्विललक’ खोलिएको छ । महानगरका मेयर बालेन शाहको निर्देशनमा नगरप्रहरीले बिहीबार बिहान प्रमुख प्रशासकीय अधिकृत चढ्ने गाडीमा ‘ह्विललक’ गरेको थियो ।

काठमाडौं महानगरपालिकाको निलम्बनमा परेका प्रमुख प्रशासकीय अधिकृत सरोज गुरागाईं तीन महिना १४ दिनपछि बिहीबार कार्यालय गएका थिए । तर, उनलाई नगरप्रहरीले कार्यालय प्रवेशमा रोक लगाउने प्रयास गरेको थियो ।

महानगरका कर्मचारी र जनतप्रतिनिधिको सहयोगमा उनी कार्यालय प्रवेश गरेका गरेका थिए । महानगरमा हाजिर गरेपछि उनी महानगरकै वातावरण व्यवस्थापन विभागको गाडीमा चढेर संघीय मामिला तथा सामान्य प्रशासन मन्त्रालय गएका थिए । उनको गाडीमा महानगरको नगर प्रहरीले ‘ह्विललक’ गरेपछि उनी विभागको गाडीमा मन्त्रालय गएका हुन् ।

गुरागाईं ०८१ पुस १४ गते निलम्बनमा परेका थिए । काठमाडौं टावर १२ तलाको बनाउने भनिएको थियो । तर, त्यसलाई १९ तलाको बनाउन स्वीकृति दिएको आरोपमा गुरागाईंलाई कार्यालयमा उपस्थित हुन रोक लगाइएको थियो ।