विराटनगर । नेपाल क्रिकेट फाउन्डेसनको आयोजनामा विराटनगरमा सम्पन्न इक्वालिटी कप क्रिकेट २०२५ प्रतियोगिताको उपाधि साविक विजेता मोरङले जितेको छ ।

बिहीबार भएको फाइनल खेलमा सप्तरीलाई ८ विकेटले पराजित गर्दै मोरङले लगातार तेस्रोपटक उपाधि जितेको हो । पहिलो संस्करणमा मोरङले झापासँग पराजित भएयता लगातार उपाधि जितेको हो । 

टस हारेर ब्याटिङ गरेको सप्तरीले निर्धारित २० ओभरमा ९ विकेट गुमाई ८१ रन जोडेको थियो । सप्तरीकी साक्षी यादवले २८ रन बनाउँदा दीपा रामले अविजित १५ रनको योगदान दिइन् । 

मोरङकी प्लेयर अफ फाइनल कृतिषा धामीले ५ विकेट लिइन् । उनले किफायती बलिङ गर्दै ४ ओभरमा १ मेडन राख्दै ९ रन दिइन् । धामीबाहेक बन्दना राजवंशीले ३ विकेट लिइन् । 

८२ रनको लक्ष्य पछ्याएको मोरङले ११ दशमलव १ बलमा २ विकेट गुमाई सो विजयी लक्ष्य पार गरेको थियो । मोरङको जितमा सानु राजवंशीले अविजित ४० रन बनाउँदा कप्तान टीका साहले १५ रनको योगदान दिइन् । सप्तरीकी साक्षी यादवले १ विकेट लिँदा अपेक्षा यादवले पनि १ विकेट लिइन् । 

प्रतियोगिताको प्लेयर अफ सिरिज सिरहाकी सरस्वती चौधरी घोषित हुँदा उत्कृष्ट ब्याटर सप्तरीकी साक्षी यादव, उत्कृष्ट बलर मोरङकी ऋतिषा धामी र उत्कृष्ट विकेट किपर मोरङकी प्रिंसा राना मगर भइन् । 

प्रतियोगितालाई म्यारिलीबोन क्रिकेट क्लब फाउन्डेसन र क्रिकेट विथ आउट बाउन्ड्रिजको सहयोगमा क्रिकेटमा महिलाको सहभागिता अभिवृद्धि अभियानअन्तर्गत प्रतियोगिता आयोजना भएको हो ।

विजयी तथा अन्य खेलाडीलाई प्रमुख अतिथि कोशी प्रदेश क्रिकेट संघका अध्यक्ष सर्वजितराज पाण्डे, मोरङ जिल्ला क्रिकेट संघका अध्यक्ष महमद साद बाबु र नेपाल क्रिकेट फाउन्डेसनका अध्यक्ष अभिषेक श्रेष्ठलगायतले पुरस्कार तथा प्रमाणपत्र वितरण गरे ।