काठमाडौं । वन तथा वातावरणमन्त्री ऐनबहादुर शाहीले चैत १५ गतेको आन्दोलनमा जलाइएको जडीबुटी उत्पादन तथा प्रशोधन केन्द्र छिट्टै सञ्चालनमा आउने बताएका छन् । बिहीबार केन्द्रको अनुगमन गरेका उनले अहिले प्राविधिक र विज्ञ राखेर छलफल गरिरहेको बताए ।

“प्राविधिक र विज्ञ राखेर छलफल गरिरहेका छौँ । दश करोड भयो भने अस्थायी सञ्चालन हुन्छ भन्ने छ । क्याबिनेटमा छलफल भइसकेको छ । चाँडै रकम उपलब्ध हुन्छ,” उनले भने ।

अनुगमनमा काठमाडौं–२ की प्रतिनिधिसभा सदस्य सोबिता गौतम पनि थिइन् । उनले आगो लगाउनेलाई सरकारले कानुनी दायरामा ल्याउनुपर्ने बताइन् । उनले प्रशोधन केन्द्रलाई घना बस्तीबाट सार्नुपर्ने पनि बताइन् ।

प्रशोधन केन्द्रकी महाप्रबन्धक संगीता यादवलगायत पदाधिकारीले आगलागीबाट क्षतिबारे जानकारी गराएका थिए ।