काठमाडौं । कानुन व्यवसायीहरूको छाता संस्था नेपाल बार एसोसिएसनको अध्यक्षमा दुई पूर्वमहासचिवबीच भिडन्त हुने भएको छ । यही चैत २३ गते हुने निर्वाचनका लागि बार चुनावमा नौ हजार ९९७ वकिल मतदाता छन् ।

बार चुनावमा सत्तारूढ नेपाली कांग्रेस र नेकपा (एमाले) निकट कानुन व्यवसायीहरूसँग राष्ट्रिय प्रजातन्त्र पार्टी (राप्रपा) निकट कानुन व्यवसायीहरू मिसिएका छन् । कांग्रेसनिकट डेमोक्रेटिक लयर्स एसोसिएसन (डीएलए), एमाले निकट प्रोग्रेसिभ प्रोफेसनल लयर्स एसोसिएसन (पीपीएलए) र राप्रपा निकट राष्ट्रिय प्रजातान्त्रिक कानुन व्यवसायी संगठनको गठबन्धन बनेको छ । उक्त गठबन्धनलाई माओवादी, नेकपा (एकीकृत समाजवादी) र राष्ट्रिय स्वतन्त्र पार्टी (रास्वपा) निकट कानुन व्यवसायीहरूको गठबन्धनले चुनौती दिँदैछ ।

दुवै गठबन्धनले पूर्वमहासचिहरूलाई अध्यक्ष उमेदवारका रूपमा अघि सारेका छन् । ०६६ देखि ०६९ सम्म पूर्वअध्यक्ष प्रेमबहादुर खड्काको  नेतृत्वको कार्यसमितिमा महासचिव भएर काम गरेका वरिष्ठ अधिवक्ता प्रा. डा. विजयकुमार मिश्रलाई त्यसअघिको कार्यकालमा ०६३ देखि ०६६ सम्म विश्वकान्त मैनाली नेतृत्वमा महासचिवको भूमिका निर्वाह गरेका वरिष्ठ अधिवक्ता तथा पूर्वन्यायाधिवक्ता रमनकुमार श्रेष्ठले चुनौती दिँदै छन् ।

मिश्र नेपाली कांग्रेसनिकट वकिलहरूको संगठन डेमोक्र्याटिक लयर्स एसोसिएसनका उमेदवार हुन् भने श्रेष्ठ माओवादीनिकट कानुन व्यवसायीहरूको संगठन रिपब्लिक लयर्स एसोसिएसन आरपीएलएका उमेदवार हुन् । श्रेष्ठले पुष्पकमल दाहाल प्रचण्ड नेतृत्वको सरकारदेखि शेरबहादुर देउवा नेतृत्वको सरकारसम्म महान्यायाधिवक्ताको भूमिका निर्वाह गरेका छन् । डीएलका मिश्र नेतृत्वका टिममा एमाले निकटको पीपीएलका केदार कोइराला महासचिव उमेदवार छन् । आरपीएलका श्रेष्ठ नेतृत्वको टिममा रास्वपा निकट कानुन व्यवसायी यज्ञमणि न्यौपाने महासचिव उमेदवार छन् । न्यौपाने यसअघि रास्वपाको अनुशासन समितिमा समेत बसेर काम गरेका छन् ।

करिब १० हजार मतदातामध्ये आठ हजारभन्दा कम मत खस्ने अनुमान छ । त्यसमा विपक्षी दल निकट गठबन्धन झन्डै तीन हजार मतले पछाडि छ । तर, अध्यक्षमा भने विपक्षी गठबन्धनले बाजी मार्ने गठबन्धनमा आबद्ध संगठनहरूको दाबी छ । विपक्षी दलहरूनिकट प्यालनका अध्यक्ष उमेदवार श्रेष्ठको प्रस्तावक पूर्वअध्यक्ष शम्भु थापा र वरिष्ठ अधिवक्ता सुशील पन्त समर्थक छन् । शम्भु पनि नेपार बारले नागरिक समाजको अगुवा संस्थाको साख गुमाएको भन्दै त्यो साख फर्काउन श्रेष्ठको व्यक्तित्वले काम गर्ने बताउँछन् । त्यही साख फर्काउन श्रेष्ठलाई सबैले अध्यक्ष चुन्ने उसको दाबी छ ।

“नेपाल बार एससोसिएसन शम्भु थापाको पालादेखि कमजोर बनेको छ । नेपाल बारले उठाएका सही मुद्दा समेत स्थापित नहुुनुमा यसको नेतृत्वको कमजोरी मुख्य कारण बन्ने गरेको छ,” एकीकृत समाजवादीनिकट वरिष्ठ अधिवक्ता घनप्रसाद गौतमले बाह्रखरीसँग भने, “उहाँको व्यक्तित्वका कारण सबै उमेर समूहको रोजाइमा पर्नु हुन्छ । अध्यक्षमा हामी चुनाव जित्छौँ ।”

मतदाता संख्यामा झन्डै तीन हजार अन्तरले पछि रहे पनि भोट गन्दा गठबन्धनको त्यो संख्या उल्टिने उनको दाबी छ ।

डीएलएका मिश्र नेतृत्वको समूह भने सदस्यमा स्वतन्त्र उमेदवारी दिनेहरूका कारण केही सदस्य प्रवेश गर्नु संयोग भए पनि मुख्य पद सबै टिमले नै जित्ने दाबी गर्छ । उसका अनुसार चार हजार बढी मतान्तर पहिले नै देखिएको अवस्था उल्टाउछु भन्नु चुनावी प्रचारका लागि नारा बनाउन मात्र पर्याप्त हुनेछ ।

“विजय मिश्रका लागि डीएलए नै एकल शक्ति हो । एक्लै हुँदा समेत चुनाव जित्ने अवस्थामा पीपीएलए समेत मिसिँदा ८० प्रतिशत बढी मत हुन्छ,” मिश्र महासचिव हुँदाका अध्यक्ष प्रेमबहादुर खड्काले बाह्रखरीसँग भने, “फेरि मिश्र आफैँमा बौद्धिक व्यक्ति हुन् । प्राध्यापक भइसकेका, ‘डक्टोरेड’ गरेका र तल्लो तहसम्मका कानुन व्यवसायीले गुरु मान्ने व्यक्ति भएकाले पनि उनको हार आकाश खस्नुसरह छ ।”

अधिवक्ता डा. रुद्र शर्मा व्यक्तित्वका हिसाशले दुवै उमेदवार बलियो भए पनि तुलना गर्दा मिश्र माथि पर्ने तर्क गर्छन् । उनी बार काउन्सिलमा महान्यायाधिवक्ता, अध्यक्ष र बार अध्यक्ष, उपाध्यक्ष हुने भन्दै रमन अध्यक्ष भइसकेकाले उपाध्यक्ष भएर भूमिका निर्वाह गर्न भोलिका दिनमा समस्या हुने बताउँछन् ।

“रमनजीको व्यक्तित्व राम्रै भए पनि मिश्रको तुलनामा शालिनताको अभाव छ,” शर्माले बाह्रखरीसँग भने, “उहाँ यसअघि महान्यायाधिवक्ता हुँदै बार काउन्सिलको अध्यक्ष भइसक्नुभएको छ । बार अध्यक्ष, काउन्सिल उपाध्यक्ष हुने हुँदा उहाँलाई बार अध्यक्ष बन्नु त्यति स्वभाविक पनि देखिँदैन ।”

बारमा अध्यक्ष एकजना, उपाध्यक्ष एक महिलासहित आठजना, महासचिव एकजना, कोषाध्यक्ष एक र १४ जना सदस्य गरी २५ सदस्यीय कार्यसमिति निर्वाचित हुन्छ । बार चुनावका लागि काठमाडौंसहित देशका ३६ स्थानमा निर्वाचन केन्द्र तोकिएका छन् ।

यसपटक अध्यक्षमा आशिष पौडेल, राजु कैती र उज्जवल घिमिरेले स्वतन्त्र उमेदवारी दिएका छन् ।  निर्वाचित हुने २५ पदका लागि बारमा ५७ जनाको उमेदवारी परेको छ ।