विराटनगर । नेपाल क्रिकेट फाउन्डेसनको आयोजनामा जारी चौथो संस्करणको ‘इक्युवालिटी कप क्रिकेट २०२५’ प्रतियोगिताअन्तर्गत लिग चरणका सबै खेल सम्पन्न भएका छन् । लिगको अन्तिम खेलमा विजयी हुँदै मोरङ अंकका आधारमा शीर्ष स्थानमा रहन सफल भएको छ । फाइनल खेल मोरङ र सप्तरीबीच हुनेछ ।

मोरङले सप्तरीलाई सात विकेटले पराजित गर्दै अपराजित हुँदै शीर्ष स्थानमा रहन सफल भएको हो । यसअघि नै मोरङ र सप्तरीले फाइनलको यात्रा तय गरिसकेका छन् । मोरङले खेलेको तीनै खेलमा जित हात पार्दै ६ अंक जोडेको छ । यसैगरी सप्तरीले तीन खेलमा दुई जित हात पार्दै चार अंकसाथ दोस्रो स्थानमा छ ।

बुधबार टस जितेर ब्याटिङ गरेको सप्तरीले निर्धारित २० ओभरमा चार विकेट गुमाइ ८१ रन जोड्यो । सप्तरीकी साक्षी यादवले सर्वाधिक अविजित ४२ रन जाडिन् । मोरङकी निरु राजवंशीले एक विकेट लिँदा फुलकुमारी राजवंशी, बन्धना राजवंशी र किृतिषा राजवंशीले १–१ विकेट लिए ।

८२ रनको लक्ष्य पछ्याएको मोरङले १०.५ बलमा तीन विकेट गुमाएर सो विजयी लक्ष्य पार गरेको थियो । मोरङको जितमा प्लेयर अफ द म्याच टिका साहले ४१ रन बनाउँदा प्रिन्सा रानामगरले अविजित १५ रनको योगदान दिइन् । टिकाले ३० बलमा ६ चौका प्रहार गरिन् । सप्तरीकी दिपा रामले दुई विकेट लिइन् ।

यसअघि भएको पहिलो खेलमा सिरहाले इलामलाई १३३ रनको पराकिलो अन्तरले पराजित गर्दै प्रतियोगितामा पहिलो जित हात पारेको थियो । दुवै टिमले खेलमा लगातार पराजित हुँदा प्रतियोगिताबाट बाहिरिसकेका छन् । सिरहाले तीन खेलमा एकमा जित हात पार्दै दुई अंक मात्र बटुल्न सक्यो ।

टस हारेर ब्याटिङ गरेको सिरहाले निर्धारित २० ओभरमा चार विकेट गुमाउँदै १९५ रनको विशाल योगफल तयार पारेको थियो । सिरहाकी प्लेयर अफ द म्याच सरस्वती चौधरीले अविजित ७८ रन बनाउँदा मीना महतोले २६ रनको योगदान दिइन् । चौधरीले ६२ बलमा १० चौका प्रहार गरिन् । इलामकी मुना राई, टिकामाया तामाङ, प्रयंका राई र रञ्जना लिम्बुले समान १–१ विकेट लिए ।

१९६ रनको विशाल लक्ष्य पछ्याएको इलामले १६.४ बलमा सवै विकेट गुमाएर ६२ रन बनाएको थियो । इलामकी दीपा लिम्बूले सर्वाधिक ११ रन बनाइन् । सिरहाकी अनु यादव र प्रसिद्का खडकाले तीन विकेट लिए ।  

प्रतियोगितालाई म्यारिलीबोन क्रिकेट क्लब फाउन्डेसन र क्रिकेट विथआउट बाउन्ड्रीजको सहयोगमा क्रिकेटमा महिलाको सहभागिता अभिवृद्धि अभियानअन्तर्गत इक्युवालिटी कप क्रिकेट आयोजना भएको हो । मोरङ र सप्तरीबीच बिहीबार फाइनल खेल हुने आयोजकले जनाएको छ ।