काठमाडौं । राष्ट्रिय प्रजातन्त्र पार्टी (राप्रपा)का सांसद बुद्धिमान तामाङले तीनकुने घटनाको निष्पक्ष छानबिन गर्न माग गरेका छन् । बुधबार संसद्‌को राज्य व्यवस्था तथा सुशासन समितिको बैठकमा सांसद तामाङले घटनाको छानबिनबिना एकपक्षीय ढंगले प्रचार गरिएको दाबी गरे ।

"त्यस घटनाको तुरुन्तै न्यायिक जाँच होस् । जुन किसिमले एकतर्फीरूपमा भइरहेको छ, यो गलत भइरहेको छ । कस्तो गलत भइरहेको छ भन्ने कुरा समय आएपछि भनौँला," उनले भने ।

सांसद तामाङले आफूहरू पनि प्रदर्शनमा सहभागी हुन खोजेको तर मञ्चमा दुर्गा प्रसाईंको फोटो देखेपछि नगएको पनि खुलाए । "हाम्रो पार्टीको अध्यक्ष राजेन्द्र लिङ्देनज्यू, ज्ञानेन्द्र शाहीसहित हाम्रो ग्रुप नै थियो । हामी प्रदर्शनमा जाने कुरा भइरहेको थियो । तर, मञ्चतिर हेर्दा त राजाको फोटो, त्यही साइजको दुर्गा प्रसाईंको फोटो राखेको देखियो । ओहो, खत्तम रहेछ भन्ने लाग्यो । हामी गएनौँ," उनले भने ।

उनले अगाडि भने, "आन्दोलनलाई समर्थन गर्ने भनेरमात्र हुँदो रहेनछ । हाम्रोबाट अध्यक्ष जानुभएन, धेरैजना जानुभएन । मैले पनि यसो हेरेको दुर्गा प्रसाईंको फोटो देखेपछि टाप कसिहालेँ नि । फोटो देखेर डर लागिहाल्यो नि ।"

तर, कार्यक्रम सुरु नहुँदै मञ्चमा अश्रुग्यास प्रहार गरिएको उनको दाबी छ । "मान्छेहरू आउँदै थिए, कार्यक्रम सुरु हुँदै थियो । त्यहीबेला मञ्चमा टियरग्यास हानियो । यस घटनामा एक पक्षलाई मात्र दोष लगाउने काम भइरहेको छ, जुन गलत भइरहेको छ । यस विषयमा निष्पक्ष छानबिन हुनुपर्छ," सांसद तामाङले भने ।

उनले ठोष प्रमाणबिना नै आफ्ना पार्टीका नेतालाई थुन्ने काम भएको गुनासो पनि गरे । "हाम्रो पार्टीको वरिष्ठ उपाध्यक्ष थुनामा हुनुहुन्छ, महामन्त्री थुनामा हुनुहुन्छ । उहाँहरूलाई भएभरका कानुन लगाइएको छ । पहिले त उहाँहरू दोषी हो कि होइन पत्ता लगाउनुपर्‍यो नि," उनले भने ।

आगामी दिनमा यस्ता घटना दोहोरिन सक्ने भन्दै उनले आफूहरू गृहमन्त्रीलाई भेट्न जान लागेको जानकारी गराए ।

"भोलि अरूलाई पनि यस्तै पर्न सक्छ । त्यसैले हामी गृहमन्त्रीलाई डेलिगेसन दिन जाँदै छौँ । यस घटनामा न्यायिक जाँच हुनुपर्छ । सत्यतथ्य पत्ता लगाउनुपर्छ । दोषीलाई नेपालको कानुनअनुसार कारबाही हुनुपर्छ," उनले दोहोर्‍याए ।