काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सरकारले तीनकुनेको घटना लुकाएझैँ वीरगन्जस्थित सानोपाइला सहकारीको रकम गोर्खा मिडियामा गएको भनेर भ्रम फैलाएको आरोप लगाएका छन् ।

मंगलबार सिंहदरबारस्थित सभामुख देवराज घिमिरेसँगको भेटपछि सञ्चारर्मीको जिज्ञासामा लामिछानेले पर्साको मुद्दा सरकारले मान्छे लगाएर दर्ता गराएको आरोप लगाए ।

"अदालतलाई, प्रक्रियालाई सम्मान गर्नुपर्छ, कतिपय प्रश्न पनि आउलान् भनेर कुरेर बसेको थिएँ । तर, सरकारले त्यसलाई हतियार बनाएर राखेर पर्सा झुन्ड्याइरहेको छ । मान्छे लगाएर हालिएको मुद्दा, हदम्याद छैन । सबै थाहा छ, जगजाहेर छ । सरकार छोपेका छौँ भन्छ, हामी नांगो देखिरहेका छौँ । सरकार छोपेँ भन्ठान्छ, यही तीनकुनेले छोपेको जस्तो । नांगो भइसक्यो, देखिएको छैन," लामिछानेले भने ।

पार्टीको जिम्मेवारीमा फर्किएपछि लामिछानेले मंगलबार सभामुखलाई भेटेर सांसद पदको निलम्बन फुकुवा गर्न माग गरेका छन् ।

जवाफमा सभामुख घिमिरेले आफूले लामिछानेको निलम्बन फुकुवा गर्न नसक्ने बताएका छन् । रास्वपाका नेताहरूलाई घिमिरेले निलम्बन आफूले नगरेको स्पष्ट पारेको सभामुखका प्रेसविज्ञ शेखर अधिकारीले जानकारी दिए ।