काठमाडौं । लगातार चार दिन सदन अवरुद्ध भएपछि प्रधानमन्त्री केपी शर्मा ओली सोमबार (चैत १८) जवाफ दिन प्रतिनिधिसभा बैठकमा उभिए । उनले जवाफ दिन थालेको केही समयमा नै संसद्‌मा होहल्ला भयो । उनी झोक्किए ।

यही चैत १५ गते काठमाडौंको तीनकुनेमा हिंसात्मक प्रदर्शन र पूर्वराजा ज्ञानेन्द्र शाहको सक्रियताप्रति बैठकमा उनले लिखित धारणा राखिरहेका थिए ।

“...फागुन २५ गते कथित स्वागत सवारी आयोजना गरियो । चैत १४ गते समाज बिथोल्न लागिपरेका एकजना अवाञ्छित व्यक्तिलाई आफ्नै निवासमा डाकेर कथित जनकमान्डर तोक्नुभयो र हिंसात्मक वारदातका लागि खटाउनुभयो,” प्रधानमन्त्री ओलीले भने ।

• प्रधानमन्त्रीले भने– पूर्वराजाले हिंसात्मक वारदातका लागि दुर्गा प्रसाईंलाई खटाए (पूर्णपाठ)

उनले पूर्वराजा शाहले विगतको सम्झौता उल्लंघन गरेको आरोप लगाउँदै गर्दा राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर (ज्ञानेन्द्र) शाही आफ्नो आसनमा उभिए । शाहीले नियमापत्तिका निम्ति समय माग गरे । सभामुख देवराज घिमिरेले उनलाई आफूले बोल्न समय नदिएको भन्दै बस्न आग्रह गरे ।

तर, शाहीले मानेनन् । त्यसपछि सभामुखले प्रधानमन्त्रीलाई सम्बोधन रोक्न आग्रह गरे ।

“प्रधानमन्त्री आफ्नो मन्तव्य रोक्नुस् । र, के ...,” सभामुखले भने । प्रधानमन्त्री रोकिएनन् । प्रधानमन्त्रीले लिखित सम्बोधन पढिरहे ।

सभामुखले फेरि भने, “प्रधानमन्त्री... ।”

प्रधानमन्त्री ओलीले विगतमा दलहरू र पूर्वराजा शाहबीच भएको सहमतिबारे जानकारी गराइरहे । राप्रपा सांसदहरू उभिएर होहल्ला गरिरहे ।

अनि सभामुखले भने, “माननीय सदस्यहरू, आसनग्रहण गर्नुस् । प्रधानमन्त्रीले समय पाउनुभएको छ । उहाँले बोलिरहनुभएको छ ।”

राप्रपाका सांसद रोकिएनन्, सभामुखले आसनग्रहण गर्न भनिरहे र प्रधानमन्त्रीले आफ्नो मन्तव्य पढिरहे ।

शाहीले प्रधानमन्त्रीले नियमावली उल्लंघन गरेको बताए । त्यसपछि प्रधानमन्त्री झोक्किए, “नियमावली होइन, यहाँ संविधान उल्लंघन गर्ने, व्यवस्था मास्ने कुरासँग म प्रश्न उठाइरहेको छु । यस देशमा सबैले संविधान मान्नुपर्छ, व्यवस्था मान्नुपर्छ । हल्ला गरेको भरमा राजनीति र संसद् सबैलाई अवरोध गर्ने काम गर्न मिल्दैन ।”

उनले सम्बोधन गरिरहँदा सभामुखले बस्न भने पनि राप्रपाका सांसदले अस्वीकार गरे ।

प्रधानमन्त्री ओलीको सम्बोधन सकिएपछि सभामुखले शाहीलाई दुई मिनेटको समय दिए । उनलाई समय दिइएपछि सत्तापक्षीय सांसदले आपत्ति जनाए ।

फागुन २५ गते पूर्वराजा शाहलाई विमानस्थलमा गरिएको स्वागतलाई प्रधानमन्त्रीले ‘कथित’ भनेर होच्याएको शाहीले टिप्पणी गरे । उनले उक्त शब्द संसद्को रेकर्डबाट हटाउन माग गरे ।

उनले बोलिरहँदा सत्तासाझेदार दलका सांसदले होहल्ला गरे । सभामुखले नियमित कारबाही अघि बढाउन भन्दै उनीहरूलाई बस्न आग्रह गरे । उनीहरू नरोकिएपछि सभामुखले सत्ताको नेतृत्वकर्ता दल नेकपा (एमाले)का मुख्य सचेतक महेश बर्तौलालाई बोल्न समय दिए । बर्तौलाले प्रधानमन्त्रीले बोल्ने क्रममा राप्रपाका सांसदले अवरोध र ‘डिस्टर्ब’ गरेको बताए ।

उनले सभामुखले शाहीलाई नियमापत्तिका निम्ति समय दिएकामा आपत्ति जनाए । शाहीले बोलेको विषय रेकर्डबाट हटाउन समेत उनले माग गरे ।

थप तस्बिर हेर्नोस्–