काठमाडौं । इन्डियन प्रिमियर लिग (आईपीएल)–२०२५ मा पञ्जाव किंग्सले विजयी सुरुआत गर्ने क्रममा गुजरात टाइटन्सविरुद्ध ११ रनको जित निकालेको छ ।

मंगलबार भएको खेलमा पञ्जावले प्रस्तुत गरेको २४४ रनको लक्ष्य पछ्याउने क्रममा गुजरातले निर्धारित २० ओभर ब्याटिङ गर्दा पाँच विकेट गुमाएर २३२ रनमात्रै बनायो । 

गुजरातका ओपनर साई सुदर्शनले सर्वाधिक ७१ रन बनाए पनि टिमको हार टार्न सकेनन् । उनले ४१ बलमा पाँच चौका र ६ छक्का प्रहार गरे । जस बटलरले ३३ बलमा चार चौका र दुई छक्कासहित ५४ रन बनाए । सर्फेन रुथरफोर्डले ४६ र कप्तान सुभमन गिलले ३३ रन थपे । 

पञ्जावका अर्शदीप सिंहले दुई विकेट लिँदा मार्को जान्सेन र ग्लेन म्याक्सवेलले समान एक विकेट लिए । 

त्यसअघि टस हारेर ब्याटिङमा आएको पञ्जावले निर्धारित २० ओभरमा पाँच विकेट गुमाएर २४३ रनको योगफल खडा गरेको थियो ।

पञ्जावका कप्तान श्रेयस ऐयरले सर्वाधिक ९७ रन बनाए । उनले ४२ बलमा पाँच चौका र नौ छक्का प्रहार गरे । प्रियान्स आर्याले ४७, सशांक सिंहले ४४, मार्कुस स्टोइनिसले २० र अज्मतुल्लाह ओमरजाईले १६ रन थपे । 

गुजरातका साई किशोरले तीन विकेट लिए । कगिसो रबाडा र राशिद खानले समान एक विकेट लिए ।