काठमाडौं । प्रतिपक्ष दलका सांसदहरूले पूर्वविशिष्टको सुविधासम्बन्धी कानुन बनाउने विषयको विरोध गरेका छन् । आइतबार प्रतिनिधिसभा बैठकको आकस्मिक समयमा सांसदहरूले सरकारले गलत निर्णय गरेको भन्दै सच्याउन माग गरे । 

प्रमुख प्रतिपक्षी नेकपा (माओवादी केन्द्र)का प्रमुख सचेतक हितराज पाण्डेले सुविधा बढाउने विषय गलत भएको बताए ।

“सुविधा बढाउने कुरा गलत छ । दलको तर्फबाट विरोध गर्दछु,” उनले भने । 

माओवादीका अर्का सांसद देवेन्द्र पौडेलले विशिष्ट पदाधिकारीलाई सेवा सुविधा दिने कानुन बनाउने कुरा गरेर सरकारले विवेक गुमाएको आरोप लगाए । “विशिष्ट व्यक्तिको सेवा सुविधानको कानुन बनाउने कुरा गरेर जनताप्रति गर्नुपर्ने विवेक गुमाएको महसुस भएको छ । यसो नगर्न र जनताको पक्षमा प्रभावकारी काम गर्न हार्दिक अनुरोध गर्दछ,” उनले भने । 

यस्तै, नेकपा (एकीकृत समाजवादी)का सांसद प्रकाश ज्वालाले राज्यलाई भार थपिने गरी कानुन बनाउन नहुने बताए । उनले सरकारले पूर्वविशिष्टलाई सेवा सुविधा थप्ने विधेयक सदनमा नल्याउन चेतावनी दिए ।

“राज्यलाई भार थपिने गरी पूर्वविशिष्ट पदाधिकारीलाई थप सुविधा गर्ने कानुन ल्याउँदै छ,” उनले भने, “यसप्रति घोर आपत्ति गर्न चाहन्छु । सरकार तत्कालै पछि फर्कियोस् । यो विधेयक संसद्‌मा ल्याउने धृष्टता नगरोस् ।” 

ज्वालाले मन्त्रिपरिषद्ले मनोमानी गरी दिएको सुविधाको अन्त्य गर्नुपर्ने बताए । उनले अहिले भएका पदाधिकारीको समेत सुविधा घटाउनुपर्ने बताए । सांसदको सुविधा घटाउनुपर्ने भन्दै उनले आफू तयार रहेको बताए । 

राप्रपा सांसद रोशन कार्कीले पनि पूर्वविशिष्टको सेवा बढाउने विषयमा आपत्ति जनाइन् ।