काठमाडौं । चलचित्र ‘राजागंज’ले प्रिमियरमा राम्रो प्रतिक्रिया पाएको छ । बुधबार काठमाडौंमा गरिएको प्रिमियरमा कलाकारदेखि राजनीतिज्ञसमेत उपस्थित थिए । 

प्रिमियरमा पूर्वप्रधानमन्त्री बाबुराम भट्टराई, महिला नेतृ हिसिला यमी, प्रतिनिधिसभा सदस्य अमरेश कुमार सिंह, मनिष झालगायत पुगेका थिए । 

निर्देशक नवीन सुब्बा, लेखक तथा निर्देशक मनोज पण्डित, निर्देशक दीपेन्द्र लामा, अभिनेत्री केकी अधिकारी, लुनिभा तुलाधर, शिल्पा मास्के, नाजिर हुसेनलगायत कलाकार प्रिमियरमा पुगेका थिए । 

पूर्वप्रधानमन्त्री भट्टराईले ‘राजागंज’ मधेस आन्दोलनको सेरोफेरोमा निर्माण भएको र आफू त्यसको प्रत्यक्ष सांक्षी भएकाले सिनेमा धेरै तथ्यपरक भएको बताए । 

“मलाई दुःख के लाग्यो भने जुन सिनेमामा आज हामीले हेर्न पायौँ, पूर्णरुपमा त्यसका केही महत्वपूर्ण अंश काटिएको छ भन्ने सुनेँ,” उनले भने । 

महिला नेतृ यमीले ‘राजागंज’ उत्कृष्ट बनेको बताइन् । सेन्सरबाट महत्वपूर्ण सिन काट्दा चलचित्रको भाव मर्ने उनले बताइन् । 

अभिनेत्री केकी अधिकारी र ऋमा विश्वकर्माले चलचित्र राम्रो बनेको भन्दै हेर्न आग्रह गरे । अभिनेता दयाहाङ राईले सिनेमाका विभिन्न ‘लेयर’मा कथा हेर्न पाइने उनले बताए । 

शुक्रबारबाट रिलिज हुने यो चलचित्रमा आशा मगराती मुख्य भूमिकामा छिन् । दीपक रौनियारले निर्देशन गरेको चलचित्र शुक्रबारबाट रिलिज हुँदै छ । 

आशा र दयाहाङसँगै विजय बराल, ऋचा शर्मा, पशुपति राई, निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठलगायत कलाकारको अभिनय छ ।