विराटनगर । मंगलबार कोसी प्रदेशसभाको बैठकमा प्रधानमन्त्री केपी शर्मा ओली शालीन ढंगले प्रस्तुत भए । उनको स्वभावअनुसार विपक्षी दल र अन्य राजनीतिक दलले आफूहरूलाई घोचपेच अनि कटाक्ष गर्ने आशंका गर्दै सदनमै अनुपस्थित हुनसक्ने चेतावनी दिएका थिए । 

कोसी प्रदेशका विपक्षी दलहरूको चेतावनीपछि मुख्यमन्त्री हिक्मत कार्कीले आज बिहानमात्र माओवादी संसदीय दलका नेता इन्द्रबहादुर आङ्वोसाग छलफल गरेका थिए ।
 
विपक्षीले उठाएका सवालहरूमा प्रदेश सरकारले चासो नदिने र नसुन्ने गरेको आङ्वोको आरोप थियो । ‘आफ्ना कुरा नसुन्ने, तर पूर्वजानकारीविना नै प्रधानमन्त्रीको मन्तव्य सुन्नुपर्ने’ भन्दै विपक्षीहरूले घुर्की लगाएका थिए । तर, मुख्यमन्त्रीले विपक्षीको भावनाको कदर गर्ने वचन दिएपछि माओवादी केन्द्र, एकीकृत समाजवादी र राप्रपाका सांसदहरू बैठकमा सहभागी भएका थिए । 

आङ्वोसँग छलफलमा मुख्यमन्त्रीले असमझदारी निरूपण गरेर अघि बढ्ने बताएका थिए ‌। हुन पनि प्रधानमन्त्री ओलीले सदनलाई सम्बोधन गर्ने क्रममा कोसी प्रदेशकै भौगोलिक, ऐतिहासिक, धार्मिक इतिहासका साथै जातीय अन्तरघुलन र यसको महत्त्वबारे बताए । 

ओलीले कृषि, पर्यटन विकास, श्रम, रोजगारी, जलवायु परिवर्तनको असर हिमाल तथा हिमनदीको पर्यावरणीय महत्त्वका बारेमा पनि चर्चा गरे ।
 
ओलीले भने,‘‘त्यही भएर सगरमाथा सम्मेलन गर्दै छौँ । यसले हाम्रो हिमाल, यिनको महत्त्व र यसबाट लिन सकिने फाइदाबारे जानकारी हुनेछ ।’’ उनले कृषि, शिक्षा, पर्यटनको विकाससँगै गरिबी निवारणमा अन्य प्रदेशको तुलनामा छिट्टै प्रगति गर्नसक्ने बताए । 

जनप्रतिनिधि थप जिम्मेवार भई जनतालाई सेवा दिन र उनीहरूको समस्या समाधानमा केन्द्रित हुनुपर्ने सुझाव उनले दिए ।

संविधानको संशोधन सदनको दुईतिहाई बहुमतले गर्न सक्ने स्मरण गराउँदै ओलीले निकै दुःख गरेर दुईपटकको संविधानसभाले संविधान बनाएको बताए । भने,‘‘जनताको अधिकारलाई सुनिश्चित गरेको छ, तर केही सुधार गरेर जानुपर्ने भए जान सकिन्छ ।’’ 

ओलीले अब मुलुक पछि फर्कन नसक्ने भन्दै यो अवधिमा विकासका दृष्टिले धेरै काम भएको बताए । ‘‘केही भएन होइन, धेरै काम भएका छन्, अझै हुँदैछन्,’’ उनले भने,‘‘क्षमता अभिवृद्धिमा ध्यान दिनसके देशमा रोजगारीका अवसर प्रशस्त बन्नेछन् ।’’ 

उनले कृषि आधुनिकीकरण र उद्योगको विकासबाट निर्वाहमुखीभन्दा पनि जीवनदायी अवस्था सिर्जना हुने बताए ‌। ओलीले प्रदेशलाई काम गर्न र सघाउन संघीय सरकार सहयोगी बन्ने बताए । 

उनले भने,‘‘जनता र जनप्रतिनिधिका कुरा सुन्ने सरकार हो ‌। म सबैसँग छलफल गर्न तयार छु ‌ । अब हामीलाई शान्ति चाहिएको छ ‌।’’

ओलीले नागरिक सर्वोच्चता भएको प्रणालीबारे स्पष्ट रहेको र समाजवादतर्फ उन्मुख रहेको बताए। “हामी सामन्तवादतर्फ उन्मुख छैनौँ । दुईपटकको संविधानसभाले जनतामा शक्ति रहेको संविधान बनाएको हो । यसलाई दुईतिहाइले संशोधन गर्न सक्छ,” ओलीले भने ।

ओलीले आफू विभिन्न रोगको सामना गर्दै बाँचेको र उमेरको कुरा भन्दा पनि आफू दुःख गरेर यो अवस्थामा आएको सुनाए । भने,‘‘मलाई कुनै लफडा र वादविवाद गर्नु छैन । म सबैको कुरा सुन्न तयार छु ‌। म राष्ट्रिय एकताको पक्षमा छु । देश बनाउकै लागि अहिले पनि सक्रिय बनेको हो ।’’ 

कोसी प्रदेशको उन्नतिमा आफू सधैँ क्रियाशील रहने प्रधानमन्त्रीको भनाइ थियो ।