काठमाडौं । धादिङ उद्योग वाणिज्य संघको कार्यालयमा बुधबार कर्मचारीहरूले ताला लगाए । यसरी ताला लगाउँदा चार कर्मचारी एकैतर्फ थिए । आफूहरूले १५ महिनादेखि नियमित पारिश्रमिक नपाएको भन्दै कर्मचारीहरूले कार्यालयको गेटमा सूचना टाँस गरी ताला लगाए ।

एक पक्षले गेटको चाबी खोलेर कार्यालय आउन थालेका छन् । यसरी कार्यालयको ताला खोल्नेमा सहायक प्रशासक जनक परियार र राममाया बस्नेत छन् । उनीहरूले नै सहमति जनाएपछि माघ १५ गतेबाट कार्यालय नआउने सहमति भएको थियो । तर, तलब नै नपाइकन परियार र बस्नेत कार्यालय आएका छन् ।

सहायक कर्मचारी रामचन्द्र श्रेष्ठ र दिलबहादुर कुमाल भने कार्यालय आएका छैनन् । श्रेष्ठ र कुमालले हालम्म तलब पाएका छैनन् । तर, परियार भने आफूहरूले तलब पाएको बताउँछन् । “हामीबीच पहिले सहमति भएको हो । अहिले सबै मिलिसक्यो । अध्यक्षज्यूले एक–दुई दिनमा सबैको मिलाइदिन्छु भन्नु भएको छ,” परियारले बाह्रखरीसित भने, “अहिले त्यस्तो समस्या छैन । कार्यालय खुला नै छ । बन्द छैन ।”

तर, आफूहरूले १५ महिनादेखि तलब नपाएपछि ताला लगाइएको श्रेष्ठ र कुमाल बताउँछन् । हालसम्म पनि आफूहरूले तलब नपाएको उनीहरूको गुनासो छ । कुमाल करारका सहायक कर्मचारी हुन् भने परियार, श्रेष्ठ र बस्नेत स्थायी कर्मचारी हुन् । उनीहरू चारैजनाको सहमतिमा गेटमा ताला लगाएर सूचना टाँसिएको थियो ।

निवर्तमान कार्यसमितिले कर्मचारीहरूलाई दिनुपर्ने तलब अडिट रिपोर्टमा उल्लेख नगरेको र नवनिर्वाचित कार्यसमितिले पनि वेवास्था गरी आलटाल गरिरहेकाले बाध्य भएर दबाब दिन ताला लगाइएको श्रेष्ठ र कुमालको प्रतिक्रिया छ ।

“भत्ता तथा पेस्की स्वरुप केही रकम दिए पनि पारिश्रमिक नदिएको र तलब माग गर्दा नयाँ निर्वाचित कार्यसमितिले पुरानो तलब दिन नसक्ने भनेपछि हामी चारजनाले नै सहमतिमा ताला लगाएका थियौँ,” श्रेष्ठले भने ।

यता, संघका वरिष्ठ उपाध्यक्ष रोहित भण्डारी कर्मचारीको विषयमा कुनै समस्या नरहेको बताउँछन् । कर्मचारीहरू बीचको आपसी विषयले गर्दा समस्या आएको हुन सक्ने उनले बताए । “हामीले कर्मचारीहरूको विषयमा मेलमिलाप गरिसकेका छौँ,” उनले भने, “उद्योग वाणिज्य संघले मासिक तलब दिन सक्दैन । केही महिनाको बाँकी त हुन्छ । तर, धेरै महिनाको तलबको विषयमा समस्या छैन ।”

तर, कर्मचारीहरूले गत वर्ष २०८० मंसिरदेखि तलब नपाएको र सामूहिक कार्यालय नआउने भनेर माघ १३ गते सहमति गरेका छन् ।