यो सेन्ट्रल सिड्नी
हेरिरहेकी छे एकोहोरो ओलिभर नाइया
त्यो क्विन एलिजाबेथको सालिक
एकाएक तर्सिन्छे ऊ
जब छेउबाट हिँडिरहेको डग बाल्टर
पानी चढाउँछ एलिजाबेथको शरीरमा
र पिच्च पिच्क्याउँछ जब बिस्टा
उडिरहेको काग क्विन एलिजाबेथको टाउकोमा ।

सम्झन्छे ओलिभर
नबनोस् सालिक कागको ट्वाइलेटको निमित्त
डगहरूको खुसीको निमित्त
मेरो फादर ओलिभर जोनको चिहान छ
तर, छैन सालिक
ऊ शुद्ध छ
छैन फोहोर उसमाथि
बिचरा क्विन, डस्टबिन बनेकी छिन्
के जितिन् खै !
टक्रक्क सडकछेउ
ट्राफिकझैँ उभिएर
नबनोस् सालिक
छि !

सम्झन्छे ओलिभर नाइया पढिएको इतिहास
जति बेला अपराधीहरू कैद गरिन्थे यस टापुमा
सायद तिनकै निम्ति सुरक्षा हालेर बसेकी होली
बिचरी क्विन एलिजाबेथ !

तर, ऐले खै स्वतन्त्र मान्छेहरू
सभ्य अत्याधुनिक मान्छेहरू
खै चढाउँदैनन् एक थुँगा फूल
न त चढाउँछन् एक विशुद्ध मन
क्वारक्वार्ती हेर्दै हतारमा बाटो काट्छन्
हेरिरहेकी छिन् क्विन एलिजाबेथ
दुई शताब्दी समयहरू
यही सडकमा कुल्चिएर
कट्कटिएको आची
र सुकेको पिसाब बोकेर !
नबनोस् सालिक व्यर्थ
नबनोस् सालिक ।

म पनि ऐले सम्झिरहेछु
मेरो नेपाल र
राजा पृथ्वीनारायणको भत्काइएको सालिक ।