नयाँदिल्ली । बंगलादेशको अन्तरिम सरकारका सूचना सल्लाहकार तथा विद्यार्थी आन्दोलनका प्रमुख नेता नाहिद इस्लामले सल्लाहकार परिषद्बाट राजीनामा दिएका छन् ।

बंगलादेशको अन्तरिम सरकारका प्रमुख मोहम्मद युनुसलाई नाहिद इस्लामले राजीनामा बुझाएका छन् ।

नाहिद इस्लामले आफ्नो राजीनामा पत्रमा लेखेका छन्, "प्रदर्शनपछि विद्यार्थी र जनताको अपीलमा नयाँ बंगलादेश निर्माणको जिम्मेवारी लिनुभएकोमा म तपाईं (मोहम्मद युनुस)प्रति धेरै आभारी छु ।"

"सल्लाहकार परिषद्मा मलाई हुलाक, दूरसञ्चार तथा सूचना प्रविधि मन्त्रालय, सूचना तथा प्रसारण मन्त्रालयको जिम्मेवारी दिइएको थियो । विभिन्न चुनौतीका बाबजुद पनि तपाईंको नेतृत्वमा मैले आफ्नो जिम्मेवारी पूरा गर्ने प्रयास गरेको छु," उनले थप भने, "तर वर्तमान परिस्थितिमा देशको बृहत्तर हितमा विद्यार्थी र जनताको बीचमा उपस्थित रहनुपर्छ भन्ने मलाई लाग्छ, त्यसैले पदबाट राजीनामा दिनु उचित ठान्छु ।"

गत वर्ष बंगलादेशमा विद्यार्थीहरूले प्रदर्शन गरेका थिए । यसपछि तत्कालीन प्रधानमन्त्री शेख हसिनाले राजीनामा दिएर देश छाडेकी थिइन् ।