काठमाडौं । नेपाली राष्ट्रिय टिमकी फरवार्ड सावित्रा भण्डारी (साम्बा)ले अन्तर्राष्ट्रिय महिला च्याम्पियनसिपको फाइनल अझै गाह्रो हुने भए पनि आफूहरू त्यसका निम्ति तयार रहेको बताएकी छन् ।

नेपाली टिमले आइतबार प्रतियोगिताको लिग चरणको अन्तिम खेलमा म्यानमारसँग २–२ को बराबरी खेलेको थियो । अब बुधबार नेपालले म्यानमारसँग नै प्रतियोगिताको उपाधिका निम्ति प्रतिस्पर्धा गर्ने तालिका छ ।

आइतबार नेपाली टिम दुईपटक पछि परे पनि पुनरामगन बराबरी गरेको थियो । यस खेलको ‘प्लेयर अफ दी म्याच’ समेत चुनिएकी सावित्राले एक गोल र एक असिस्ट गरेकी थिइन् ।

खेलपछि पत्रकारसँगको कुराकानीमा सावित्राले फाइनलमा निम्ति नेपाली टिम तयार रहेको बताएकी हुन् ।

“पहिलो हाफको १० मिनेट हाम्रो टिम सन्तुलित भएन । बल पोसेसनमा हामी कमजोर देखियौँ । तर, गोल खाइसकेपछि एक टिम भएर खेललाई फेरि सुरु गर्यौँ । अझै पनि सानोतिनो गल्ती भइरहेको छ । त्यो कुराहरूलाई आगामी दिनमा कम गर्नेछौँ,” उनले भनिन्, “खेलाडीको रुपमा हामी सबै प्रेरित छौँ । यो नतिजाले हामीलाई अतिरिक्त जोश मिलेको छ । हामी फाइनल यही भावना र मनोबल लिएर खेल्नेछौँ । म्यानमार बलियो टिम हो । फाइनल अझै गाह्रो हुनेछ । हामी त्यसको लागि तयार छौँ ।”

चार देशको सहभागिता रहेको प्रतियोगितामा म्यानमार शीर्ष र नेपाल दोस्रो स्थानमा रहँदै फाइनल पुगेका हुन् । यस्तै, अन्य दुई टोली लेबनान र कीर्गिस्तान भने प्रतियोगिताको लिग चरणबाट बाहिरिएका छन् ।